АНУ-ын иргэд цар тахлын аюулыг төдийлөн "ойшоохгүй" байна

АНУ-д коронавирусийн халдвараар нас барсан хүний тоо өчигдөр буюу лхагва гарагт 100.000-ын босгыг давлаа. Энэ нь ердөө дөрвөн сарын дотор хүрсэн тоо юм.

Нийт халдварын батлагдсан тоо нь 1.7 саяд ойртжээ. Өчигдөр Associated Press агентлагаас явуулсан санал асуулгын үр дүн нийтлэгдсэн ба үүнд оролцсон америкчуудын 50 хувь орчим нь хэрвээ Covid-19 өвчний эсрэг вакцин гарвал хамрагдана гэж хариулсан байна. Эндээс АНУ-ын олон нийт коронавирусийн цар тахлын аюулыг төдийлөн ойшоохгүй байгаа нь харагджээ.

Сүүлийн өдрүүдэд АНУ-ын ерөнхийлөгч Дональд Трамп, түүнтэй ирэх 11 дүгээр сард болох сонгуульд өрсөлдөх Жо Байден нарын хооронд амны хаалт зүүх, зүүхгүй талаар маргаан өрнөж байна. Даваа гарагт болсон дайнд амь үрэгдсэн цэргүүдийг дурсах өдрийн арга хэмжээнд оролцохдоо Жо Байден амны хаалт зүүсэн байв.

Бүгд Найрамдах намын талыг баримталдаг Fox News сувгийн хөтлөгч Байдены зургийг твиттер хуудсандаа нийтлээд “Трамп амны хаалт зүүх дургүй байдаг нь аргагүй юм” гэж элэглэжээ. Дональд Трамп энэ элэглэлийг тэр дор нь өөрийн твиттер хуудсанд дахин нийтэлсэн юм.

Харин мягмар гарагт Жо Байден CNN сувагт ярилцлага өгөхдөө амны хаалт зүүснийг нь шоолсон Трампыг “жинхэнэ тэнэг” гэж нэрлэсэн байна. “Ерөнхийлөгч хүн бусдыг манлайлж, үлгэрлэх ёстой. Тэнэг зан гаргаж, хуурамч хүчирхэг дүр эсгэх ёсгүй” гэж тэр Трампыг шүүмжилжээ.

Өчигдөр АНУ-ын халдварт өвчин судлалын хамгийн том мэргэжилтэн гэгддэг, доктор Энтони Фаучи амны хаалт зүүх нь цар тахлын үед иргэний үүргээ биелүүлж байгаа хүний таних тэмдэг юм гэж ярьсан байна. “Амны хаалт нь өөрийгөө болон бусдыг хамгаалах ач холбогдолтойгоос гадна үүргээ гүйцэтгэж байгаа хариуцлагатай иргэний бэлгэдэл, таних тэмдэг юм” гэж тэр CNN сувагт ярьжээ.

Дэлхийд хамгийн олон халдварын батлагдсан тоотой 10 орны тоо баримтуудыг Жон Хопкинсийн их сургуулиас гаргаснаар хүргэж байна.

	Улс	Халдварын тохиолдол	Эндэгдэл	Харьцаа
1	АНУ	1,695,776	100,047	6%
2	Бразил	391,222	24,512	6%
3	ОХУ	370,680	3,968	1%
4	Их Британи	268,616	37,542	14%
5	Испани	236,259	27,117	11%
6	Итали	231,139	33,072	14%
7	Франц	183,038	28,599	16%
8	Герман	181,524	8,428	5%
9	Турк	159,797	4,431	3%
10	Энэтхэг	150,793	4,344	3%
	Дэлхийд	5,619,589	352,550	6%