Д.Мөнх-Эрдэнэ, М.Чимэддорж нарыг ҮБХ-ноос хасах шийдвэр гаргажээ

АН-ын Үндсэн дүрмийн хороо өчигдөр хуралдаж, ҮБХ-ны гишүүн М.Чимиддорж, Д.Мөнх-Эрдэнэ нар Үндсэн дүрмийн 3.7.6, 3.9.1 15 дахь заалтыг  зөрчсөн гэж үзжээ. Үүний дагуу М.Чимиддорж, Д.Мөнх-Эрдэнэ нарыг АН-ы ҮБХ-ны гишүүний сонгуульт албан тушаалаас огцруулах удирдлагын шийдвэр гарсан байна. Уг шийдвэрийн биелэлтэд хяналт тавьж ажиллахыг АН-ын ерөнхий нарийн бичгийн дарга Ц.Баатархүүд даалгажээ.

Д.Мөнх-Эрдэнийн тухайд өчигдөр намаасаа гарч байгаагаа мэдэгдэж, албан бичгээ АН-ын ерөнхий нарийн бичгийн дарга Ц.Баатархүүд өгсөн юм. Тэрээр нэлээд хэд хоногийн өмнө "АН сонгуульд нэр дэвшигчдээсээ 100 сая төгрөгийн дэнчин авсан. Одоо хоёр дахь шатны гэрээ хийж 300-400 саяыг авч байна. АН-ын ҮБХ-ны гишүүдийн 51 хувь нь С.Эрдэнэ даргын ах дүү, хамаатан садан. Намын байр өнгө зүс ороод байгаагаас биш татвар өгдөг гишүүдийн амьдрал өнгө орохгүй байна" хэмээн намын даргаа ширүүн шүүмжилсэн юм.