Уур амьсгалын ногоон сангийн хөрөнгө оруулалтаар 7 төсөл хэрэгжүүлнэ

 УИХ-ын чуулганы нэгдсэн хуралдаанаар Хамтран ажиллах тухай Монгол Улсын Засгийн газар, Уур амьсгалын ногоон сангийн хэлэлцээрийг соёрхон батлах тухай хуулийг батлав.

Тус сан жил бүр 100 тэрбум ам.долларыг уур амьсгалын өөрчлөлтийг сааруулахад зориулдаг байна. Монгол Улс хүлэмжийн хийн ялгарлыг бууруулах зорилгоор тус сангийн хөрөнгө оруулалтаар 7 төсөл хэрэгцүүлэхээр төлөвлөсний дотор Ногоон зээлийн сан байгуулах асуудал багтаж буй юм. Тиймээс төслүүдийг амжилттай хэрэгжүүлэх үүднээс тус сантай хамтран ажиллах хэлэлцээр байгуулахаар Засгийн газар ноднин 5 дугаар сард шийдвэрлэсэн байна. Улмаар өнгөрсөн оны 11 дүгээр сарын 22-нд БОАЖ-ын саайд Э.Цэрэнбат тус сангийн удирдлагуудтай хэлэлцээрт гарын үсэг зурж, баталгаажуулжээ.

Хуулийн төслийг хуралдаанд оролцсон гишүүдийн 72.7 хувь дэмжиж батлав. Чуулганаар Эрүүгийн хэргийн талаар эрх зүйн туслалцаа харилцан үзүүлэх тухай Монгол Улс, БНХАУ-ын Засаг захиргааны онцгой бүс Макаогийн хэлэлцээрийг соёрхон батлах тухай хуулийн төслийг хэлэлцэж байна.