Иран баллистик пуужин хөөргөжээ

Иран улс газар нутгийнхаа өмнөд хэсгээс “Шахаб-3” хэмээх дунд зайн баллистик пуужин хөөргөсөн тухай “Fox News” телевиз мэдээлжээ.

“Шахаб-3” пуужин 960 км зам туулан Ираны нийслэл Тегеранаас холгүй орших цөлд унасан байна. Энэ нь Ираны АНУ, Их Британи, Саудын Арабтай хурцадмал болоод буй харилцааг улам муутгах нь тодорхой.

Өнгөрсөн сарын 13-нд Оманы буланд хоёр танкер хөлөг онгоцонд дэлбэрэлт болсонд АНУ, Их Британи, Саудын Араб зэрэг улс орон Ираныг буруутгасан ч Тегеран хөлөг онгоцуудыг довтлоогүй гэж мэдэгдсэн юм. Мөн сарын 20-нд Ираны зэвсэгт хүчин АНУ-ын Тэнгисийн цэргийн тагнуулын нисгэгчгүй “RQ-4” онгоцыг унагасан билээ. Үүний хариуд АНУ Ираны гурван объектод цэглэсэн цохилт өгөх байлдааны ажиллагаа боловсруулжээ. Гэвч байлдааны ажиллагаа эхлэхээс 10 минутын өмнө АНУ-ын Ерөнхийлөгч Доналд Трамп цохилт өгөхийг зогсоох тушаал өгсөн юм.

Н.Түвшин