Зеленскийг Украины ерөнхийлөгчийн сонгуульд ялсанд Трамп баяр хүргэв

    АНУ-ын ерөнхийлөгч  Дональд Трамп Украины ерөнхийлөгчид нэр дэвшигч Владимир Зеленскийг сонгуульд ялсантай нь холбогдуулан баяр хүргэжээ. РИА Новости агентлаг эндхийн олон нийтийн мэдээллийн хэрэгслүүдийн бичсэнийг иш татан ингэж уламжилсан байна.

“Дональд Трамп Зеленскийд утасдан, баяр хүргэлээ. Дөнгөж сая”  гэж украины сэтгүүлчид мэдээлжээ. 

Түрүүнд нь НАТО-гийн ерөнхий нарийн бичгийн дарга Йенс Столтенберг Зеленскийг ялалт байгуулсантай холбогдуулан баяр хүргэсэн байна. 

Украины ерөнхийлөгчийн хоёр дахь шатны сонгууль дөрөвдүгээр сарын 21-нд  болсон юм. Саналын хуудсын 50  хувийг тоолсны дараа Владимир Зеленский 73,01 хувийн саналаар тэргүүлж байна. 

Украины одоогийн ерөнхийлөгч Петр Порошенко 24,65 хувийн санал аваад байна. Тэр сонгуульд ялагдсанаа  нэгэнт хүлээжээ. 

Урьдчилсан мэдээгээр, сонгуулийн ирц 62 гаруй хувь болсон байна.

С.Инда