“Оскар 2019”-ийн есөн онцлог

Дэлхийн хамгийн нэр хүндтэй киноны шагнал “Оскар”-ын эздийг зарлах 91 дэх удаагийн ёслол ирэх хоёрдугаар сарын 24-нд Лос Анжелесийн “Долби” театрт болно. Тэгвэл өчигдөр Америкийн кино академийн гишүүд энэ жил “Оскар”-ыг номинац тус бүрт горилогчдыг зарлажээ.

Сүүлийн 30 жилд анх удаа албан ёсны хөтлөгчгүй болох киноны тус наадмын энэ жилийн есөн онцлогийг дор танилцуулж байна.

1.Супер баатрын тухай кино анх удаа гол шагналд нэр дэвшив

“Шилдэг кино” номинацид анх удаа комик зохиолын супер баатрын тухай уран зөгнөлт кино нэр дэвшжээ. Тэр нь “Marvel Comics” хэвлэлийн газрын комик номоор сэдэвлэсэн “Хар ирвэс” (“Black Panther”) кино юм.

2.Англиас өөр хэл дээрхи кино анх удаа арван номинацид өрсөлдөнө

Мексик найруулагч Алфонсо Куароны “Рома” кино англиас өөр, тодруулбал испани хэлнээ хийгдсэн ч анх удаа арван номинацид нэр дэвшжээ. Энэ кино түүнчлэн “Netflix” компаниас “Оскар”-т нэр дэвшсэн анхны дэлгэцийн бүтээл болж байна.

3.Латин америк бүсгүй анх удаа “Оскар”-ын шагнал авч болзошгүй

“Рома” киноны гол дүрд тоглосон Мексикийн 26 настай Ялица Апарисио Америкийн кино академийн шагналыг авсан анхын Латин Америкийн эмэгтэй жүжигчин болох магадлал их байна. “Шилдэг эмэгтэй гол дүрийн жүжигчин” номинацид түүнтэй Леди Гага, Гленн Клоус, Оливиа Колман, Мелисса Маккарти нар үлджээ.

4.Хар арьст найруулагч Спайк Ли анх удаа “Шилдэг найруулагч” номинацид шалгарчээ

“KkKlan-ы хар арьст гишүүн” (“BlacKkKlansman”) киногоороо хар арьст найруулагч Спайк Ли анх удаа “Оскар”-ын “Шилдэг найруулагч” номинацид шалгарсан байна.

5.”Ивээгдсэн бүсгүй” кинонд тоглосон гурван бүсгүй бүгд “Оскар”-т нэр дэвшив

Найруулагч Йоргос Лантимос “Ивээгдсэн бүсгүй” (“The Favourite”) хэмээх түүхэн драмын кинондоо Оливиа Колман, Эмма Стоун, Рэйчел Вайс нарыг тоглуулсан. Тэгвэл эдгээр эмэгтэй жүжигчид бүгд “Оскар”-ын шагналд нэр дэвшжээ.

6.”Од төрлөө” кинонд өмнө нь тоглосон бүсгүйчүүдийн нэгэн адил Леди Гага “Оскар”-ын төлөө өрсөлдөнө

Авьяас билэгт бүсгүй амжилтын оргилд хүрч буйг харуулдаг “Од төрлөө” (“A Star Is Born”) киног өмнө нь 1954, 1976 онуудад хийж байжээ. Тэдгээр киноны гол дүрд тоглосон Жанет Гейнор, Жуди Гарланд нар “Оскар”-т нэр дэвшиж байсан аж. Тэдний адил алдарт поп дуучин Леди Гага “Од төрлөө”-гийн шинэ хувилбарт тоглосноор Америкийн кино академийн шагналд мөн л шалгарчээ.

7.Леди Гагагийн давхар амжилт

“Од төрлөө” мюзикл кино Леди Гагагийн жүжигчнээс гадна хөгжмийн авьяасыг улам бүр тодруулжээ. Юу гэвэл тэрээр “Шилдэг эмэгтэй жүжигчин”-ээс гадна “Шилдэг дуу” номинацид нэр дэвшсэн юм.

8.Рэп дуучин Кендрик Ламар анх удаа “Оскар”-ын үдэшт оролцоно

Рэп дуучид “Оскар”-ын шагналд нэр дэвшсэн нь хуруу дарам цөөн. Тэгвэл энэ жил Кендрик Ламар “Хар ирвэс” киноны дуугаараа зүй ёсоор шалгарчээ.

9.Хөгжмийн зохиолч Марк Шеймен дээд амжилтын төлөө

“Мэри Поппинс эргэн ирсэн нь” (“Mary Poppins Returns”) киноны хөгжмийг бичсэн Марк Шеймен нэгэн дээд амжилтад хүрэхэд ойрхон байна. Юу гэвэл тэрээр энэ киноны хөгжмөөр “Эмми”, “Гремми”, “Тони” шагналуудыг хэдийнэ хүртээд байгаа билээ.

  Б.Сансар