АНУ-ын нисэх хүчний хоёр онгоц Японы эргээс холгүй мөргөлдөж сүйрчээ

АНУ-ын нисэх хүчний “F/A-18” сөнөөгч-бөмбөгдөгч “КС-130” шатахуун түгээгч онгоцтой урьд шөнө орон нутгийн цагаар 02.00-т Японы эргээс холгүй мөргөлдөж сүйрсэн тухай тус улсын Тэнгисийн явган цэргийн газраас мэдэгджээ.

Хоёр онгоц Японы Ивакуни дахь АНУ-ын цэргийн баазаас хөөрсөн бөгөөд төлөвлөгөөний дагуу сургуулийн нислэг хийж байсан аж.

 “CBS” телевизийн сурвалжлагч Мэри Волшийн мэдээлснээр, “KC-130”-ийн бүхээгт таван хүн, “F/A-18” онгоцонд хоёр нисгэгч байжээ.

Эрэл хайгуул, авралын ажиллагаа эхэлсэн бөгөөд онгоцууд юунаас болж мөргөлдсөний талаар тодорхой мэдээллийг хараахан өгөөгүй байна. Ажиллагаанд оролцож буй Японы зэвсэгт хүчнийхэн нэг нисгэгчийг аварсан чадсан тухай “ABC” телевиз олж мэджээ.

Б.Туг