Меланиа Трамп Америкийн үндэсний гацуур модны гэрлийг асаалаа

АНУ-ын Ерөнхийлөгчийн албан ёсны өргөө Цагаан ордноос холгүй оршдог цэцэрлэгт хүрээлэнд айсуй зул сар, шинэ жилийн баярыг тохиолдуулан тус улсын үндэсний гацуур модны гэрлэн чимэглэлийг асаах ёслол болсон тухай “Ройтерс” агентлаг мэдээлэв.  

Ёслолын эхэнд АНУ-ын Ерөнхийлөгч Доналд Трамп тэргүүн хатагтай Меланиа Трампын хамт гацуурын өмнө байрлуулсан сум нэвтрэхгүй шилэн хаалт бүхий индэр дээр гарч иржээ. Доналд Трамп цэцэрлэгт хүрээлэнд цугларагсдад хандан, “Хүн бүрт зул сарын баяраа цэнгэл дүүрэн тэмдэглэхийг хүсэн ерөөе! Та бүхэнтэй энд хамт байхад сайхан байна. Одоо гацуур модны гэрлээ асаацгаая. Тэргүүн хатагтай үүнийг гүйцэтгэнэ” гэжээ.

Тэгээд арваас нэг хүртэл тоолсны дараа Меланиа Трамп индэр дээрх тусгай товчлуур дарахад оройдоо дөрвөн хошуутай од бүхий Америкийн үндэсний гацуур модны гэрэл ассан байна.

Үүний дараа Ерөнхийлөгчийн гэр бүл цугларагсдын хамт зул сарын сэдэв бүхий бэсрэг концерт үзэж сонирхжээ. Цэцэрлэгт хүрээлэнд гол гацуураас гадна АНУ-ын мужуудыг бэлгэдсэн 56 гацуурыг чимэглэсэн аж.

АНУ-д үндэсний гацуур модны гэрэл асаах ёслол 1923 онд Ерөнхийлөгч Калвин Кулижийн үеэс эхлэн уламжлагджээ.

Б.Туг