"ОУВС-ийн хөтөлбөр хэрэгжсэнээр эдийн засагт гэрэл ассан"

“ОУВС-ийн хэлэлцээрийн үр дүн” сэдвээр Сангийн Сайд Ч.Хүрэлбаатар, ОУВС-ийн ажлын хэсгийн ахлагч Жефф Готлеб нар яг одоо Сангийн яаманд мэдээлэл хийлээ.

Сангийн сайд Ч.Хүрэлбаатар: ОУВС-гийн хөтөлбөр хэрэгжсэн өнгөрсөн арван сарын хугацаанд Монгол Улсын эдийн засагт нэлээн олон нааштай өөрчлөлтүүд гарлаа. Валютын нөөц 3 тэрбум ам.долларт хүрсэн, 2017 оны Гүйцэтгэлийн байдлаар Монгол Улсад 1.1 тэрбум ам.долларын хөрөнгө оруулалт хийгдсэн. Төрийн сангийн дансны үлдэгдэл 405 тэрбум төгрөг болсон байна.

Эдийн засгийн бодлогыг зөв явуулж, тууштай арга хэмжээ авбал богино хугацаанд сэргэж болдгийг харууллаа.

Төсвийн орлого 660 тэрбум төгрөгөөр давж биелсэн. Төсвийн алдагдал ДНБ-ий 9.5 хувиас 6.5 хувь болж 3 пунктээр буурсан. Төрийн сангийн дансны үлдэгдэл 405 тэрбум төгрөг болсон байна.

Засгийн газар 1.1 их наядын үнэт цаасыг арилжааны банкуудад хийсэн байсан. Өндөр хүүтэй Засгийн газрын үнэт цаасуудыг худалдан авч улсын төсвөөс гарах хүүгийн зардлыг 120 тэрбум төгрөгөөр хэмнэж чадсан.

Эдийн засгийн бодлогыг зөв явуулж, тууштай арга хэмжээ авбал богино хугацаанд сэргэж болдог гэдгийг харуулж байна. ОУВС-ийн хөтөлбөрийн хүрээнд 5.5 тэрбум ам.долларын хөрөнгө оруулалт орж ирж байна.

ОУВС-ийн талаар хүмүүс сөрөг зүйл яриад байдаг. Энэ удаа Монгол Улсад явуулсан хөтөлбөр үр дүнгээ өгсөн, эдийн засагт гэрэл асаасан, Монгол Улсын эдийн засагт үүр цайж эхэлсэн гэдгийг хэлмээр байна.

Цаашид ОУВС-гийн хөтөлбөрийг Засгийн газраас хэрэгжүүлнэ. Эдийн засагт эерэг үр дүн гарсан учраас зарим татваруудыг цуцалсан.

Хоёрдугаарт тэтгэврийн насны асуудал байна. Тэтгэвэрт гарах насанд сонголт хийх боломжийг өгч байгаа. Энэ нь шударга ёсонд нийцсэн шийдвэр. Дараагийн нэг асуудал цалин нэмэгдүүлэх. 2018 оноос инфляцийн түвшинтэй уялдуулж цалин нэмнэ. Огт нэмэхгүй бол үнийн өсөлт, ханшийн уналтад иргэдийн бодит орлого идэгдээд дуусдаг.

ОУВС-тай хөтөлбөрөө Засгийн газар үргэлжлүүлнэ. Бидэнд бий болсон энэ нөхцөл байдал, тогтвортой өсөлтийг цаашид үргэлжлүүлэх шаардлага байгаа гэдгийг онцолж хэлмээр байна" гэв.

ОУВС-гийн Монгол дахь хөтөлбөрийг хариуцсан ажлын хэсгийн ахлагч Ж.Готлеб "Эдийн засгийн гүйцэтгэл бидний төсөөлснөөс хамаагүй сайн гарч байна. Үндсэн шалтгаан нь түүхий эдийн үнэ өндөр байгаатай холбоотой. Энэ өсөлтийг дагаад дотоодын эрэлт ч нэмэгдэж байна.

2017 оны 4 дүгээр сард батлагдсан хөтөлбөр нийт 5.5 тэрбум ам.долларын багцтай. Хөтөлбөрөөс нааштай үр дүнгүүд хэдийнэ гараад эхэллээ.

Хөтөлбөр хэрэгжсэнээс хойш гарсан нааштай үзүүлэлээс гурван зүйлийг онцолмоор байна. Нэгдүгээрт, төлөгдөх ёстой бондуудыг төлсөн, хоёрдугаарт гадада валютын нөөц нэмэгдсэн, гуравдугаарт Засгийн газрын өрийн хэмжээ 10 орчим хувиар буурлаа.

Нааштай өөрчлөлтүүдийн үр дүнд төгрөгийн гадаад валюттай харьцах ханш чангарлаа. Нэг жилийн өмнөх үетэй харьцуулбал Монголын эдийн засаг эрсдэлд өртөх магадлал багаслаа.

Эдийн засгийн гүйцэтгэл сайжирсан нь экспортын гүйцэтгэлтэй шууд холбоотой хэдий ч Засгийн газрын зүгээс зөв бодлого хэрэгжүүлсэн гэж дүгнэж байна. Гэсэн хэдий ч цаашид энэ нөхцөл байдал эерэг хэвээрээ хадгалагдана гэсэн баталгаа байхгүй.

Эдийн засагт эрсдэл нүүрлэсэн хэвээр байна. Тухайлбал, экспортын эрэлт огцом буурах, дэлхийн зах зээлд газрын тосны үнэ нэмэгдвэл Монголын эдийн засагт том цочрол болж болзошгүй. Тийм болохоор энэ эрсдэлээ харгалзаж үзээд Засгийн газар энэ бодлогуудаа цаашид үргэлжлүүлэх ёстой.

Төсөв болон Мөнгөний бодлогоо зөв хэрэгжүүлбэл эдийн засаг өндөр, тогтвортой өснө гэдэгт бүрэн итгэлтэй байна" гэв.