П.Орхон олимпийн тэтгэлэгт хамрагдлаа

МҮОХ-ны ерөнхийлөгч Д.Загдсүрэн болон бусад удирдлагууд өнөөдөр хүндэтгэлийн танхимдаа 'Парис-2017' чөлөөт бөхийн насанд хүрэгчдийн ДАШТ-ээс алт, хүрэл медаль хүртсэн, Монголын чөлөөт бөхийн холбооны удирдлага, багш, дасгалжуулагч болон алтан медаль хүртсэн П.Орхоныг хүлээн авч, хүндэтгэл үзүүллээ.

Энэ үеэр дэлхийн аварга П.Орхонд 'Токио-2020' олимпийн наадмын тэтгэлэг гардуулсан юм. П.Орхон анх удаа тэтгэлэгт хамрагдаж буй нь энэ аж.

Олимпийн наадмаас медаль хүртэх боломжтой тамирчдад дэмжлэг үзүүлэх зорилгоор ОУОХ-ноос энэхүү тэтгэлэг хөтөлбөрийг зарласан байдаг. Энэхүү тэтгэлэг хөтөлбөрт хамрагдаж буй тамирчин нь ёс зүйн зөрчил гаргах, допингийн төрлийн эм бэлдмэл хэрэглэсэн нь тогтоогдох, олимпод оролцох эрхээ авч чадахгүй бол хөтөлбөрөөс хасагдах журамтай. Өнгөрсөн 'Рио-2016' олимпийн наадмын тамирчдын тэтгэлэгт хөтөлбөрт манай 17 тамирчин хамрагдаж байв.

'Ханбург-2017' боксын ДАШТ-ээс хүрэл медаль хүртсэн Гавьяат тамирчин Д.Отгондалайд мөн уг тэтгэлгийг гардуулах аж. Д.Отгондалайгийн хувьд дээрх тэтгэлэгт хоёр дахиа хамрагдаж байна.