“Сагсан бөмбөгийн 3х3” тэмцээн Сүхбаатарын талбайд болж байна

Сагсан бөмбөгийн 3х3 төрлийн Гранпри тэмцээн Монгол улсад анх удаа болж байна. Монголын сагсан бөмбөгийн үндэсний холбоо, Олон улсын сагсан бөмбөгийн холбоотой хамтран зохион байгуулж буй тус тэмцээнд 12 орны баг оролцож буй юм байна. Сүхбаатарын талбайд болж буй тус тэмцээнд Серб, Словени, Бразил, Испани, Голланд, Австрали, Япон, БНАСАУ, Франц, Чех, ОХУ-ын шилдэг багууд дээр зохион байгуулагч орны давуу эрхийн дагуу манай улсаас дөрвөн баг багтсан. Өчигдөр хэсгийн тоглолт болсон бол өнөөдөр медалийн төлөөх шийдвэрлэх тоглолтууд болох аж.

Тэмцээнийг дэлхийн 100 гаруй оронд шууд дамжуулж байгаа бөгөөд Сүхбаатарын талбайд өндөр хурдны интернетийг холбож, 468 хүний суудалтай талбайг зассан байна. Энэхүү тэмцээний шилдэг хоёр баг ирэх долоодугаар сард Японд болох “FIBA 3x3 World Tour”-д оролцох эрхийг авах юм.

Ж.МАРАЛ