Азийн АШТ: З.Занабазар мөнгөн медаль хүртлээ

Өсвөр үеийн ДАШТ-ий хүрэл медальт, Азийн аварга, залуучуудын Азийн АШТ-ий хүрэл медальт, “Pune Mayor`s Cup” ОУТ-ий хүрэл медальт, Ерофей Хабаров, Борис Будаев, Бувайсар Сайтиевийн нэрэмжит ОУТ-ий аварга, насанд хүрэгчдийн УАШТ-ий мөнгө, хүрэл медальт, залуучуудын улсын гурав, өсвөр үеийн дөрвөн удаагийн аварга “Арслан” клубийн тамирчин ОУХМ Занданбудын Занабазар мөнгөн медаль хүртлээ.

Тэрбээр Шинэ Делигийн дэвжээнд тэгшитгэлд Тажикистаны Жамшид Шарифовыг 13:0-ээр, шөвгийн наймд өсвөр үе, залуучуудын Азийн аварга Киргизстаны Улукбек Жолдошбековыг 15:4-өөр, хагас шигшээд “Ташкент-2014”, “Лас-Вегас-2015” ДАШТ-ий тавдугаар байрын шагналт, Бакугийн “Алтан Гранпри”-гийн хүрэл медальт, Динмухамед Кунаевын нэрэмжит ОУТ-ий хошой аварга, Казахстаны Нурислам Санаевыг 8:0-ээр, алтан медалийн төлөөх барилдаанд 2014 оны ДАШТ-ий тавдугаар байрын шагналт Японы Юки Такахашид 1:7-гоор ялагдав. Анх удаа тивийн аваргад зодоглосон дөнгөж 21 настай З.Занабазар ах нараасаа айж бэргэлгүй зоримог шийдэмгий барилдсан. Шигшээ барилдаанд аргагүй туршлага дутан ялагдсан түүнд тун их ирээдүй хүлээж байна.