Г.Мандахнаран, П.Өнөрбат нар дэлхийн чансаанд багтав

Дэлхийн бөхийн нэгдсэн холбоо (UWW)-ноос хоёрдугаар сарын эрэгтэйчүүдийн чансааг шинэчлэн гаргалаа. Өнгөрсөн сард Ираны Керманшах хотод болсон Дэлхийн цом, Кубын Серра Пеладогийн ОУТ гэсэн хоёр тэмцээнийг харгалзаж чансааг гаргасан юм. Хоёрдугаар сарын чансаанд төдийлөн өөрчлөлт гараагүй бөгөөд манай хоёр бөх багтжээ. ДАШТ-ий хошой хүрэл медальт, гавьяат тамирчин Ганзоригийн Мандахнаран Риогийн олимпод тавдугаар байрт орсон амжилтаараа 65 кг-ын жинд зургаад, ДАШТ-ий мөнгөн медальт, гавьяат тамирчин Пүрэвжавын Өнөрбат өнгөрсөн жил Испанийн Гранприд хүрэл медаль хүртсэн амжилтаараа 17 дугаар байрт бичигдсэн байна. Гуравдугаар сарын чансаа нэлээдгүй өөрчлөлт гарах магадлалтай. Учир нь энэ сард Киев, Буриадын Ерөнхийлөгчийн цом, Яшар Догугийн нэрэмжит ОУТ, залуучуудын ЕАШТ шил шилээ даран болно.