“Кубок России по женской борьбе” тэмцээн өнөөдөр эхэллээ

ОХУ-ын Чуваш улсын Новочебоксарск хотын “Чебоксары Арена” спортын ордонд Чуваш улсын Тэргүүн М.В.Игнатьевийн нэрэмжит нээлттэй “Кубок России по женской борьбе” олон улсын тэмцээн өнөөдөр эхэлж байна.

ОХУ-ын Аялал жуулчлал, спортын яам, Чуваш улсын Спортын яам, Оросын спортын бөхийн холбоо хамтран зохион байгуулж байгаа энэ тэмцээнд ОХУ-ын болон АНУ, Беларусь, Итали, Казахстан, Монгол, Эстони зэрэг гадаадын 6 орны нийт 132 бөх зодоглож байна.

Өнөөдөр тэгшитгэдийн, урьдчилсан, тэгшитгэлийн болон дагах барилдаанууд болно. Маргааш үдээс өмнө хүрэл медалийн төлөөх, үдээс хойш алтан медалийн төлөөх барилдаанууд болно.

48 кг-ын жинд 32 бөх зодоглож байгаагаас Гавьяат тамирчин Ц.Энхжаргал нэгдүгээр тойрогт чувашийн бөх Алиса Даниловатай таарчээ. Энэ жинд оросын аварга, дэлхийн оюутны аварга Милана Дадашева, Надежда Фёдорова, оросын хошой аварга Елена Вострикова, Алина Морева, европийн аварга Валерия Чепсаракова нарын шилдэг бөхчүүд барилдаж байна.

53 кг-ын жинд 15 бөх зодоглож байна. Нэгдүгээр тойрогт спортын дэд мастер Б.Болор-Эрдэнэ Москва хотын бөх Татьяна Эсман, олон улсын хэмжээний мастер Г.Отгонжаргал Красноярскийн хязгаарын бөх Александра Нищенкотой барилдана. Энэ жинд залуучуудын дэлхийн аварга Ксения Незговорова, европийн залуучуудын аварга Наталья Малышева, оросын аварга Стальвирой Оршуш нар зодогложээ.

55 кг-ын жинд 23 бөх зодоглож байгаагаас нэгдүгээр тойрогт олон улсын хэмжээний мастер А.Батцэцэг дагестаны бөх Хадижат Муртузалиеватай таарч спортын мастер П.Шинэхүү нэгдүгээр тойрогт хийлж хоёрдугаар тойрогт Европийн спортын наадмын хүрэл медальт, беларуссын бөх Надежда Сушкотай хүч үзнэ.

58 кг-ын жинд 10 бөх зодоглож байгаагаас Гавьяат тамирчин С.Цэрэнчимэд нэгдүгээр тойрогт Москва хотын бөх Екатерина Вьюноватай өрсөлдөнө.

63 кг- ын жинд 8 бөх зодоглож байгаагаас нэгдүгээр тойрогт олон улсын хэмжээний мастер П.Орхон Москва мужийн бөх бөх Валерия Лазинскаятай, олон улсын хэмжээний мастер Э.Цэвэгмид Ульяновск мужийн бөх Инна Тражуковатай барилдана.

69 кг-ын жинд 16 бөх өрсөлдөж байгаагаас нэгдүгээр тойрогт Гавьяат тамирчин О.Насанбурмаа нэгдүгээр тойрогт буриадын бөх Анна Щербаковатай, олон улсын хэмжээний мастер Ш.Түмэнцэцэг Кемерова мужийн бөх Наталья Кусинатай барилдана.

75 кг-ын жинд 13 бөх зодоглож байгаагаас олон улсын хэмжээний мастер Б.Одончимэг нэгдүгээр тойрогт хийлж хоёрдугаар тойрогт спортын дэд мастер Г.Уртнасан, Санкт-Петербург хотын бөх Арина Бабкина хоёрын аль хожсонтой барилдана. Энэ жинд европийн аварга шалгаруулах тэмцээний мөнгөн медальт Алсна Стародубцева, ДАШТ-ний хүрэл медальт, эстонийн бөх Епп Мае нар зодогложээ.

Н.Цэнгэл