“Три Стар” VS “Нагауорлд”

Дээд лигийн есөн удаагийн аварга “Эрчим” өмнө нь “Три Стар” клубтэй хоёр удаа учраа таарахдаа нэг хожигдож (2:1), нэг тэнцэж (1:1) байсан. Энэ сарын 21-нд болсон тоглолтын эхний 10 минутад “Эрчим” илүү тоглолтыг үзүүлэн, хаалга чиглэсэн хэд хэдэн цохилтыг гүйцэтгэсэн. Гэвч 14 дэх минутад хаалгач Б.Ариунболд хайхрамжгүй алдаа гаргасныг эсрэг багийн легионерь довтлогч Каяоде Мартин ашиглан тооны харьцааг нээв.

Хөгжөөн дэмжигчдийнхээ өмнө тоглож буй “Эрчим” үр дүнг өөрчлөх гэж довтолж байсан ч гоол оруулж чадахгүй байлаа. Тийнхүү тоглолтын 76 дахь минутад “Три Стар” багийн ахлагч Бикрам Лама булангийн цохилтоос ирсэн бөмбөгийг мөргөж гоол оруулсан. Үндсэн цаг дуустал хаалганы тор хөдлөлгүй байсаар “Три Стар”, “Эрчим”-ийг 2:0-ээр хожлоо.

Гурван оноотой тэд хэрэв өнөөдөр “Нагауорлд”-ыг хожих юм бол хэсгээс гарах эрхээ авна. Харин эсрэгээрээ өнөөдөр “Три Стар” хожигдоод хэсгийн сүүлийн тоглолтод “Эрчим” “Нагауорлд”-ыг хоёроос илүү бөмбөгөөр хожих юм бол дараагийн шатанд шалгарах боломжтой.

Н.Цэнгэл