Их Мастер Виктор Корчной нас баржээ

Зөвлөлтийн шатарчин Виктор Корчной 86 настайдаа Швейцарьт нас баржээ.Оросын шатрын холбооны сайтад ингэж мэдээлсэн байна.

Корчной1952 онд ЗСБНХУ-ын аварга шалгаруулах тэмцээнд анх оролцохдоо зургаадугаар байранд орж, харин 1956 онд их мастер болжээ. 1960 онд ЗСБНХУ-ын аварга шалгаруулах тэмцээнд түрүүлсэн бөгөөд ер нь Зөвлөлт Холбоот Улсын аваргын дөрвөн алтан медаль хүртсэн юм.

1968 онд дэлхийн шатрын аваргын төлөө өрсөлдөгчдийн шувтаргын тэмцээнд Спасскийд хожигдож, харин 6 жилийн дараа шийдвэрлэх өрсөлдөөнд зөвлөлтийн шатрын од Анатолий Карповт ялагдсан юм.

Корчной ЗСБНХУ-ын шигшээ багийн бүрэлдэхүүнд багтаж байхдаа шатрын олимпид зургаан удаа, түүнчилэн олон улсын нэг зуу орчим тэмцээнд түрүүлжээ.

1976 онд Швейцарьт цагаачлан гарч, 1994 онд тус улсын харъяат болсон байна.

Корчной нас барах хүртлээ байнга шахуу тоглодог дэлхийн хамгийн ахмад их мастер байжээ.

С.Инда