Шатрын их мастер А.Энхтуул Олон улсын чансаагаа ахиулжээ

Азербайжан улсын 3 дахь Ерөнхийлөгч агсан Heydar Aliyev -н нэрэмжит олон улсын өндөр чансаатай шатарчдын нээлттэй тэмцээнд Шатрын их мастер А.Энхтуул амжилттай оролцжээ. Тэрээр нийт 9 өрөгт эрэгтэйчүүдийн 5 Их мастер, эрэгтэйчүүдийн 1 Олон улсын мастер болон Дэлхий шатрын холбооны эрэгтэйчүүдийн 3 мастер нартай тоглосон байна. Эрэгтэйчүүдийн 5 Их мастераас хоёрыг нь хожиж, хоёртой нь тэнцжээ. А.Энхтуул нь Голланд улсын шатарчин эрэгтэйчүүдийн супер Их мастер Сергей Тивиаковт хожигдсон боловч Герман улсын шатарчин мөн эрэгтэйчүүдийн супер Их мастер Хенкин Игорьтой тэнцжээ.

Ийнхүү тэрээр Олон улсын чансаагаа +50,1 пунктээр ахиуллаа. А.Энхтуул "Эх орноо төлөөлж оролцсон тус нэр хүндтэй тэмцээнд эрэгтэйчүүдийн супер Их мастеруудтай мөр зэрэгцэн 4, 5, 6 өргүүдэд зөвхөн шилдэгүүд "суух" эхний 5 ширээнд "тайзан" дээр дарааллан тоглож чадсандаа баяртай байна. Тэмцээний үеэр бүх зүйл дээр байнга зөвлөж байдаг МУГД, ОУМ П. Жигжидсүрэн багшдаа үргэлж баярлалаа. Мөн Их мастер Игорь Глек дасгалжуулагчаасаа тэмцээн дууссаны дараа 'Respect for your performance!' гэсэн үгтэй захиа авч, урам зориг илүү их нэмэгдэх шиг боллоо." хэмээн сэтгэгдлээ илэрхийлэв.

Н.Цэнгэл