ОУХМ Б.Цэвээндашид Монгол Улсын Төрийн далбаа гардуулан өгөв

Монгол Улсын Ерөнхийлөгчийн Тамгын газрын дарга П.Цагаан өчигдөр уулын спортын ОУХМ Базархандын Цэвээндашид Монгол Улсын Төрийн далбаа гардуулан өгсөн юм. Тэрээр Эверестийн оргилд 3 дахь удаагаа авирахаар өнөөдр эх орноосоо мордож байгаа билээ.

Төрийн далбаа гардуулах үеэр Монгол Улсын Ерөнхийлөгчийн Тамгын газрын дарга П.Цагаан хэлэхдээ “Дэлхийн дээвэр болсон Эверестэд амжилттай авираад, алтан соёмбот Төрийн далбаагаа мандуулаад, ард түмнийхээ хийморь золбоог даатгаад сайн яваад ирээрэй” гэсэн юм.

Уулын спортын ОУХМ Б.Цэвээндаш “Аливаа улс орон, байгууллага, хамт олны сүр хүч, хийморь тугандаа байдаг. Миний хувьд дэлхийн ноён оргил Эверестэд 3 дахь түүхэн авиралтаа хийхээр маргааш мордох гэж байна. П.Цагаан даргаас өнөөдөр Эверестийн оргилд мандуулах Төрийн алтан соёмбот далбаагаа гардан авлаа. Их баярлалаа. Та бүхэнд амжилт хүсье” гэв.