В.Путины дүр бүхий бөгж худалдаанд гарлаа

ОХУ-ын төрийн тэргүүний хамгийн дуртай гоёл нь бөгж байдаг аж. Тэгвэл Владимир Путины дүр төрх бүхий бөгжийг Оросын загвар зохион бүтээгчид урлаад байна. Хүчирхэг удирдагчийн дүр төрх ямар байх ёстойг Путин өөрийн биеэр харуулдаг хэмээн үзсэн зохион бүтээгчид ийнхүү тансаг зэрэглэлийн бөгжийг үйлдвэрлэн худалдаанд гаргаад байна.

ОХУ-ын Ерөнхийлөгчийн талаархи эерэг сөрөг төсөөлөл дэлхий дахинд тархсан хэдий ч гадаадын жуулчид Орос орныг хүчирхэг удирдагчаар нь төсөөлөх болсон байна. Тиймээс ч Путины дүр төрх бүхий бөгж жуулчдын дунд хамгийн эрэлттэй бүтээгдэхүүн байна хэмээн үзэж байгаа юм. Оросын улс төрийн өнгө төрхийг удаан хугацаанд тодорхойлж буй Владимир Путины дүр бүхий бөгж жуулчдын хувьд Орос орны тухай санан дурсах тун сонирхолтой дурсгал болох аж. Гэвч энэхүү бөгж харьцангуй өндөр үнээр худалдаалагдах юм байна. Матрёшка хүүхэлдэй, хүрэн баавгай, Улаан талбай гээд ОХУ-ыг бэлгэдэх олон арван бэлгэдэл байдаг ч эдгээр дээр тус улсын хүчирхэг улстөрч ийнхүү нэмэгдээд байна.

Болд-Эрдэнэ Тэргэл /UBS/