Гайхамшигт Усэйн Болт 9 дэх алтан медалаа хүртэв

Сүүлийн хоёр олимпоос 6 алтан медаль, дэлхийн аваргаас 5 алтан медаль хүртээд байгаа Усэйн Болтыг буулгаж авах хүчирхэг өрсөлдөөн өчигдөр Бээжин хотноо "Шувууны үүр" цэнгэлдэхэд өрнөлөө. Хөнгөн атлетикийн дэлхийн аварга шалгаруулах 2015 оны эрэгтэй 100 метрийн уралдаанд Ямайкийн гүйгч, дэлхийн хамгийн хурдан хүн Усэйн Болт 9.79 секунд хурдалж аваргын алтан медаль зүүлээ.

Түүний хүчтэй өрсөлдөгч АНУ-ын гүйгч Жастин Гэтлин 9.80 секунд хурдалж аваргаас ялимгүй хоцорч барианд орсноор мөнгөн медаль хүртсэн юм. Усэйн Болт, Жастин Гэтлин нар 2013 оны дэлхийн аваргад мөн 100 метрийн төрөлд алт мөнгөн медаль хүртэцгээж байсан өрсөлдөөнөө энэ жил дахин үргэлжлүүлсэн нь энэ юм. Тэгэхэд 2013 оны дэлхийн аваргаар Усэйн Болт мөн түрүүлж байжээ.

Ингэснээр Ямайкийн "шидэт хүн" Усэйн Болт өөрийн хаанчлалыг хэвээр хадгалж үлдэхийн сацуу дэлхийн аваргын 9 алтан медальтай болж чадлаа. Гэхдээ 2009 оны дэлхийн аваргын амжилтаа арай эвдэж чадсангүй. Тэр үед Усэйн Болт 9.58 секунд хурдалж байсан юм.

Н.Төгс