О.Насанбурмаа алтан медаль хүртлээ

Эмэгтэй чөлөөт бөхийн “Poland Open” XIX дэх уламжлалт олон улсын тэмцээн Польш улсын Варшав хотноо үргэлжилж байна.

Тэмцээний эхний өдөр 48, 55, 60, 69 кг-ын жингүүдийн барилдаан болж манай улсаас дөрвөн бөх барилдсанаас 69 кг-ын жинд О.Насанбурмаа бүх өрсөлдөгчөө илүүрхэн ялж алтан медалийн эзэн боллоо. Харин өнгөрсөн жилийн аварга С.Бямбацэрэн, С.Цэрэнчимэд нар хараахан медальд хүрч чадсангүй. Өнгөрсөн жилийн тэмцээний эхний өдөр эмэгтэй чөлөөт бөхийн 48, 55, 60, 69 кг-ын жингүүдийн барилдаанд манай таван эмэгтэй бөх барилдсанаас 55 кг-ын жинд С.Бямбацэрэн, 60 кг-ын жинд С.Цэрэнчимэд нар алт, 60 кг-ын жинд П.Орхон хүрэл медаль хүртсэн билээ.

Өнөөдөр эмэгтэй чөлөөт бөхийн 53, 58, 63, 75 кг-ын жингүүдийн барилдаан болж тэмцээн өндөрлөх юм. Эдгээр жинд мөн манай бөхчүүд дэвжээнд гарч барилдана.

Н.Цэнгэл