Барселона ялагдашгүй байлаа

Өнгөрсөн шөнө УЕФА-гийн Аваргуудын лигийн аварга шалгаруулах финалын тоглолт гайхалтай мөчүүдээр дүүрэн өнгөрлөө. Олон жилийн дараа Аваргуудын лигт хоёронтоо түрүүлснээс хойш 12 жилийн дараа лигийн финалын тавцанд гарч ирсэн Италийн Ювентус, 2012 онд Челси, 2013 онд Байерн Мюнхен, 2014 онд Реал Мадрид түрүүлсний дараа найм дахь удаагаа аваргын цомын төлөө өрсөлдөхөөр гарч ирсэн хүчирхэг Барселона клубуудын тоглолт хөлбөмбөгийн хорхойтнуудыг соронздон татсан юм.

Хоёр хүчирхэг клубын асар өндөр хариуцлагатай тоглолт 3:1-ийн харьцаатай Испанийн багийн ялалтаар өндөрлөсөн бөгөөд тоглолтын эхэнд Барселонагийн хорват тоглогч И.Ракитич эхний гоолыг хийсэн бол Ювентусын залуу од А.Мората 55 дахь минутад тоог тэнцүүлсэн юм.

Улмаар Лионель Мессигийн гайхалтай довтолгооноос хийсэн цохилт хаалгачийн гарт ойсныг Барсагийн бас нэгэн од Суарес гоол болгосноор тоглолтын харьцаа 2:1 болсон юм. Ювентусчууд тоог нөхөхөөр олон довтолгоог хийж байсан ч Барсагийн хамгаалалт сайн байснаас гадна Италийн клубын тоглогчдын довтолгооны гүйцэтгэл хангалттай биш байсан юм.

Ингэснээр тоог тэнцүүлж амжилгүй тоглолтын сүүл рүү дөхөх үед Барсагийн бразил од Нэймар гоолдсоноор тоглолтын эцсийн цэгийг тавьсан гэж болно. Ингээд Барселона клуб энэ тоглолтод 3:1-ийн харьцаатай өрсөлдөгчөө буулгаж авснаар тав дахь удаагаа Аваргуудын лигийн аваргын цомыг өргөлөө.

Месси, Суарес, Неймар нарын дэлхийн супер од довтлогчдыг цуглуулссан Барселонаг энэ жил зогсоох хүч байсангүй. Тэд энэ улирал гайхамшигтай байж Испанийн цом, Ла лиг, Аваргуудын лигийн түрүүг авч байна. Дашрамд дурдахад Барсагийн төлөө олон жил зүтгэж ялалтын гайхалтай түүхүүдийг бичсэн Хави Эрнандес Европ дахь карьераа ийнхүү амжилттай өндөрлөлөө.

Барселона клуб 1992, 2006, 2009, 2011 онд өмнө нь Аваргуудын лигт тус тус түрүүлж 1961, 1986, 1994 онд тус тус аман хүзүүдэж байсан амжилтаараа түүхэнд Реал Мадрид, Милан, Байерн Мюнхен клубуудын дараа дөрөвт бичигдэж байна. Испанийн алдарт Реал Мадрид клуб 10 удаа цом өргөсөн бол Италийн Милан 7 удаа, Германы Байерн Мюнхен 5 удаа өргөж 5 удаа аман хүзүүдсэн амжилтаар Барсагийн урд бичигдэж байна. Барселонагийн супер одод дахин нэг улиралд түрүүлэхэд германы клубын урд гарч түүхэнд гуравт амжилтаараа бичигдэх билээ.