Хөлбөмбөгийн баяр болов

Монголын Хөлбөмбөгийн Холбооноос жил бүрийн 6 дугаар сарын 1-ний “Хүүхдийн баяр”-ын өдрийг “ХҮҮХЭД-ХӨЛБӨМБӨГ-ИРЭЭДҮЙ” хөтөлбөрийн хүрээнд “Хүүхдийн хөлбөмбөгийн баяр” болгон тэмдэглэн өнгөрүүлдэг уламжлалтай. Энэ уламжлалын дагуу энэ жилийн хүүхдийн баяраар бяцхан хүүхэд багачуудыг МХБХ-ны “Цэнгэлдэх хүрээлэн”-д хүлээн авч, мэргэжлийн багш дасгалжуулагч нараар хөлбөмбөгийн анхан шатны арга техник болон олон төрлийн элемент, дасгал хөдөлгөөнүүдийг заалгаж, тэдэнтэй цуг тоглож, “Хүүхдийн хөлбөмбөгийн баяр”-ыг баяр баяслаар дүүрэн тэмдэглэж, мартагдашгүй сайхан дурсамжтай өнгөрөөлөө.

Тус баярт МХБХ-ны Ерөнхийлөгч А.Ганбаатар хүрэлцэн ирж хүүхдүүдэд баяр хүргэн тэдэнтэй хамт баярлан анхны гоолынх нь баярт мөчийг хуваалцсан юм.

Хөлбөмбөгийн баярт нийт 1000 орчим хүүхэд оролцсон бөгөөд багачуудын хүсэл мөрөөдлийг танадан хуваалцахад олонх хүүхэд дэлхийнхөлбөмбөгийн од Роналдо, Месси нар шиг шилдэг хөлбөмбөгчид болохыг хүсэж буйгаа илэрхийлж байлаа.

Энэхүү арга хэмжээнд хүрэлцэн ирж оролцсон хүүхэд багачуудад МХБХолбоо, Хаан Сүү ХХК-тай хамтран гарын бэлэг, хаан зайрмаг гардууллаа. Ийнхүү хүүхэд багачуудад зориулсан энэхүү арга хэмжээ үр өгөөжөөр дүүрэн, оролцсон хүүхдүүд төдийгүй тэдний эцэг эх, ах эгч нарын сэтгэлийг хөдөлгөсөн арга хэмжээ болов.