Эмэгтэй волейболчид шигшээ наймаас хасагджээ

Ази тивийн эмэгтэйчүүдийн волейболын аварга шалгаруулах тэмцээнд оролцож байгаа манай улсын шигшээ баг өчигдөр Японы багтай тоглож, 0:3-аар хожигджээ. Ингэснээр тэд шөвгийн наймаас хасагдсан юм.

БНХАУ-ын Тяньжин хотноо болж байгаа Олимпийн эрх олгох тус тэмцээнд 14 улсын баг оролцож байгаагаас өчигдөр хэсгийн тоглолт өндөрлөж, шөвгийн наймын багууд тодорч эхэллээ. Манай улсын шигшээ баг “С” хэсэгт Япон, Вьетнамын багуудтай таарсан. Энэ хэсгийн Турксменистаны баг тодорхой шалтгааны улмаас оролцох боломжгүй болсон юм. Вьетнамын баг хэсэгтээ хоёр хожилтойгоор тэргүүлсэн бол Японы баг хэсэгтээ хоёрдугаар байрт бичигдлээ.

Хэсэгтээ хоёр хожигдолтой манай улсын шигшээ баг Энэтхэгийн багтай ирэх ням гаригт тоглоно. Энэтхэгийн багийн хувьд “А” хэсэгт БНХАУ, Ираны багт хожигджээ. Гэхдээ тэд Ираны тоглолтоос нэг үеийг өөрийн болгож чадсан байна.