Жижүүрийн дэвтэр дээр сургуулийн хашаанд чоно орж ирсэн гэх мэдээлэл алга

Өчигдөр шөнө 02:45 цагт Баянзүрх дүүргийн VIII хороонд байрлах 92 дугаар сургуулийн хашаанд чоно орж ирсэн гэх мэдээллийн дагуу тус сургуулийн жижүүртэй холбогдоход “Өнгөрөгч өдөр гарсан жижүүр өглөө ээлжээсээ буусан, жижүүрийн дэвтэрт чоно орж ирсэн гэх мэдээлэл тэмдэглэгдээгүй байна” гэх хариултыг өглөө.

Мөн тус сургуулийн нярав Н.Оюунгэрэл “Ийм зүйл болсон бол бидэнд мэдэгдэхгүй өнгөрнө гэж байхгүй. Ээлжийн жижүүрүүд өнгөрөгч шөнийн болсон үйл явдлуудыг бүгдийг тэмдэглэж үлдээдэг. Өглөө ирээд шалгахад тийм тэмдэглэл байгаагүй. Бид танаас л энэ асуудлыг сонсож байна” гэсэн юм.

Албан бус эх сурвалжийн мэдээлснээр өчигдөр шөнө тус сургуулийн хашаанд орж ирсэн чоныг хот тохижилтын газрын анчин устгаж, Онцгой байдлын хэлтэст хүргүүлсэн гэнэ.

Эх сурвалж: Mnb.mn