АНУ : Оросуудад хамгийн аймшигтай зэвсэг бэлджээ

Цагаан ордноос гаргах нэг л шийдвэр ОХУ-ын түүхий эдийн экспортын үндэс суурийг ганхуулах магадлалтай байна.

Өнгөрсөн долоо хоногт Америкийн газрын тосны том компаниудын топ менежерүүд Цагаан ордны төлөөлөгчид болон Конгресст ханджээ. 1973 оноос эхлэн хэрэгжиж эхэлсэн хууль ёсоор бол Америкаас гадагш нь газрын тос экспортлохыг хориглосон бөгөөд 40 гаруй жил өөрчлөлтгүй хэрэгжиж байгаа энэ хуулийг цуцлуулахыг газрын тосны компаниуд хүсч байгаа гэнэ. Америкийн газрын тос олборлох холбоонд (Producers for American Crude Oil Exports, PACE) багтсан компанийн гол удирдлагууд Цагаан ордны эрчим хүчний асуудал хариуцсан зөвлөх Брайан Диз болон хоёр намын сенаторуудтай хэлэлцээр хийсэн байна.

Хэрвээ гадагш гаргах газрын тосны экспортыг зөвшөөрвөл илүү өндөр үнээр зарах боломжтой гэж үзэж байгаа юм. Харин ингэж Америк газрын тосоо экспортлож эхэлбэл Оросын эдийн засагт хамгийн хүнд цохилт болно гэж шинжээчид үзэж байна.

Хэрэв Америкийн нефтийн хоригийг цуцалж экспортод гаргаж эхэлбэл газрын тосны үнэ улам доош унана гэж тэд үзжээ.

2014 онд Оросын төсвийн 52 хувийг газрын тос болон байгалийн хийн борлуулалт бүрдүүлж байгаа бөгөөд үүнээс цааш үнэ унавал байдал бүр ч дордоно гэж Оросын эдийн засагчид хүлээн зөвшөөрч байгаа юм. Одоогийн оросууд борлуулж байгаа байгалийн хийнээс илүү хямд, чанар сайтай хийг Австрали санал болгож байгаа аж.

С. Раздук