Спортын шилдэг сэтгүүлчдийг тодрууллаа

Спортын сэтгүүлчид шинэ жилийн баяраа өргөн дэлгэр тэмдэглэн өнгөрүүллээ. Баярын үеэр оны шилдгүүдээ тодруулсан бөгөөд www.bukh.mn вэбсайтын фото сэтгүүлч Ч.Ганбат, ETV телевизийн спортын сэтгүүлч Т.Ганзул нар шалгарч, хагас сая төгрөгийн шагнал хүртлээ.

Сэтгүүлч Ч.Ганбатын хувьд Сочи-2014 цагаан олимпийн наадам, Инчеон-2014 Азийн зуны спортын наадмуудыг сурвалжилж, үзэсгэлэн гаргажээ. Түүнчлэн Монгол орны хилийн дагуу долоон сар гаруй үргэлжилсэн “Морьтон Монгол” төслийг амжилттай зохион байгуулсан юм.

Сэтгүүлч Т.Ганзул нь хөлбөмбөгийн ДАШТ-ий “FIFA 2014 World Cup” төслийг удирдаж, спортын бусад олон төрлийн тэмцээнийг Монголын үзэгчдэд хүргэсэн тул ийнхүү Оны шилдгээр тодорчээ.

Мөн энэ өдөр анх удаа Монгол Улсын соёлын гавьяат зүтгэлтэн, спортын ахмад сэтгүүлч Р.Чулууны нэрэмжит шагналыг гардуулсан юм. Уг шагналыг ETV телевизийн сэтгүүлч тайлбарлагч С.Шижирбат, мэдээллийн www.gogo.mn вэбсайтын сэтгүүлч У.Бадамцэцэг, “Таван цагариг” сонины фото сэтгүүлч Э.Харцага нар гардан авлаа.

Р.Чулууны нэрэмжит шагналыг УИХ-ын гишүүн, Монгол Улсын гавьяат тамирчин Х.Баттулга санаачилж санхүүжүүлсэн байна.

Н.Цэнгэл