“Halla Korean” рестораны хоолноос түлхүүр гарч иржээ

-Шүүгээнийх нь түлхүүр үйлчлүүлэгчийнх нь хоол руу оржээ-

“Halla Korean” ресторанаар үйлчлүүлсэн нэгэн үйлчлүүлэгчийн хоолноос түлхүүр гарч иржээ. Тодруулбал, тэрбээр өнөөдөр хоёр найзынхаа хамтаар Баянгол дүүрэг буюу Модны 2-ын зам дагуу байрлах “Halla Korean” ресторанд өдрийн хоолоо идэж байтал хоолноос нь түрхүүр гарч ирсэн гэнэ.Ингээд юу болсон талаар үйлчлүүлэгч М.Мөн-Оршихоос тодрууллаа.

-Та бүхэн хэдэн хоол захиалсан бэ?

-Бид гурвуулаа орсон болохоор дундаа хоёр хоол захиалсан юм. Ингээд шөлтэй хоолоо таваглаж байтал халбаганд нэг хатуу зүйл тээглэхээр нь аваад хартал түлхүүр байсан. Тэгээд үйлчлэгчийг нь дуудаж хэллээ.

-Яаж яваад хоол руу түлхүүр орчихсон юм бол. Тэд өөрсдөө юу гэж байх юм?

-Зохион байгуулагч нь ирээд уучлаарай гэж байна лээ. Миний хоолноос гарч ирсэн түлхүүрийг цааш авч яваад буцаад ирсэн л дээ. Тэгэхдээ “Түлхүүрийн эзнийг олчихлоо. Манай нэг ажилтны хувцасных нь шүүгээний түлхүүр байна. Ёстой уучлаарай” гэсэн. Ийм хариуцлагагүй байж болохгүй биз дээ. Миний хоолноос түлхүүр гарч ирж байгаа юм чинь өөр хүний хоолноос дахин юу ч гарч ирэх юм билээ гэдэг үүднээс танай сайтад хандаж байна. Мэргэжлийн хяналтын ерөнхий газар болон Хэрэглэгчийн эрх ашгийг хамгаалах нийгэмлэг зэрэг холбогдох байгууллагууд нь үүнд анхаарлаа хандуулаасай гэж хүсэх байна.