О.Гүндэгмаа ДАШТ-ээс мөнгөн медаль хүртлээ

Буудлагын дэлхийн аварга шалгаруулах тэмцээн Азербайжаны Габала хотод ойрын өдрүүдэд болж байна. Тус тэмцээнд манай улсаас оролцсонМонгол Улсын Хөдөлмөрийн баатар, Гавьяат тамирчин Отрядын Гүндэгмаа мөнгөн медаль хүртлээ. Тэрээр спорт гар бууны 25 м-ийн дасгалд чансаагаараа эхний гуравт бичигдэн, аваргын төлөө өрсөлдсөн юм. Уг төрөлд Германы Моника Каршич түрүүлж, О.Гүндэгмаа хоёрдугаар байр эзэлсэн бол удаах байрыг БНХАУ-ын Жиан Жин Зинь хүрэл медаль хүртлээ.

Тэрээр өмнө нь 1998 онд Дэлхийн аварга шалгаруулах тэмцээний хүрэл, 2006 онд Дэлхийн аваргын багийн болон хувийн хүрэл, 2002 онд Азийн аваргын хүрэл, мөн Азийн аварга, Дэлхийн цомын шигшээ тэмцээний аварга, Дэлхийн цомын цувралуудын алт, мөнгө, хүрэл медальтай бөгөөд 2005 оны Зүүн Азийн наадмын мөнгө, Ази, Африкийн наадмын хүрэл медаль зэрэг олон арван шагналын эзэн болж байсан билээ.