“Челси”-гийн домог Дрогба “гэртээ” ирлээ

Английн алдарт “Челси” клубын домогт довтлогч Дидьер Дрогба “Цэнхэрүүд”-ийн эгнээнд дахин нэгдэж, нэг жилийн гэрээ байгуулжээ. Ингэснээр Жозе Моуриньо болон Дрогба нар долоо жилийн дараа дахин хамтран ажиллахаар болж байгаа юм.

Тэрбээр үнэ төлбөргүйгээр “Челси”-д эргэн нэгдэж байгаа. Дрогба “Челси”-гийн бүрэлдэхүүнд премьер лигийн 226 тоглолтод оролцож, 100 гоол оруулсан. Ийнхүү Дрогба 2012 онд “Челси”-г орхиж, Хятадын “Шанхай Шенхуа”, Туркийн “Галатасарай” клубуудэд хүчин зүтгэж явсаны эцэстийнхүү эргэн ирлээ.

“Челси”-гийн эгнээнд дахин нэгдэх үедээ Дрогба "Хялбар шийдвэр байлаа. Жозе Моуриньотой дахин хамтран ажиллах боломжоос татгалзаж чадсангүй. “Челси”-тэй үүсгэсэн миний онцгой харилцааг бүх хүн мэднэ. “Челси” үргэлж гэр шиг минь санагддаг. Ялалт байгуулахын төлөөх миний хүсэл эрмэлзэл одоо ч хэвээрээ. Би энэ багт туслахыг тэсэн ядан хүлээж байна. Би карьерийнхаа дараагийн бүлгийг эхлүүлэх болсондоо сэтгэл өндөр байна" хэмээн ярьсан байна.

Н.Болд