Оросууд олимпийн шинэ одтой боллоо

{!!!left!!!}Сочигийн тэнгэр дор өвлийн спортын хамгийн үзүүштэй чимэг нь болсон уран гулгалтын эмэгтэйчүүдийн ганцаарчилсан төрлийн медальтнууд тодорлоо.

Урд өдөр нь хамгийн өндөр хүлээлттэй байсан эрэгтэйчүүдийн хоккейн төрөлд олимпийг үдэж нэлээд гонсгор байсан оросууд уран гулгалтын төрөлд шинэ одоо тодруулж ээлжит олимпийн алтан медалиа аваад байна.

Дөрвөн настайгаасаа энэ спортоор хичээллэж эхэлсэн, өдгөө ОХУ-ын дөрвөн удаагийн аварга, 17 настай Аделина Сотникова 224.59 оноогоор дэлхийн рекордыг шинэчлэн тогтоож олимпийн аваргын болзол хангаж Оросын ард түмнийг баярлууллаа.

Харин хоёр дахь удаагаа олимпийн аварга болох нь гэгдэж байсан, урд өдөр нь богино үзүүлбэрт тэргүүлсэн Ванкуверийн олимпийн аварга БНСУ-ын алдарт уран гулгагч Ким Юна 219.11 оноогоор мөнгөн медаль, Европын таван удаагийн аварга, 2011 оны дэлхийн аварга 27 настай Италийн уран гулгагч Каролина Костнер 216.73 оноогоор хүрэл медаль тус тус хүртээд байна.

Зүй ёсоор олны анхаарлыг өөртөө татаад байсан Японы уран гулгагч Ванкуверийн олимпийн мөнгөн медальт, дэлхийн хоёр удаагийн аварга Мао Асада богино үзүүлбэрт 16-р байрт бичигдсэн бол өчигдөр чөлөөт үзүүлбэрээ амжилттай гүйцэтгэснээр зургадугаар байрт орсон юм.

Харин багийн төрөлд алтан медаль хүртээд байсан ОХУ-ын залуу уран гулгагч Юлия Липницкая тавдугаар байрт орсон бол мөн багийн төрөлд хүрэл медаль хүртсэн АНУ-ын уран гулгагч Грейси Голд дөрөвдүгээр байрт бичигдсэн юм.

Олимпийн аварга болсон Аделина Сотникова (224.59)

Аделина Сотникова сэтгэл догдлуулсан оноо зарлах мөчийг багш нарынхаа хамтаар сонсож байгаа нь

Ванкуверийн олимпийн аварга, Сочигийн олимпийн мөнгөн медальт Ким Юна (219.11)

Италийн уран гулгагч дэлхийн аварга, Каролина Костнер 216.73 оноогоор Сочигийн олимпийн хүрэл медалийг хүртлээ

АНУ-ын Грейси Голд 205,53 оноогоор дөрөвдүгээр байрт

Багийн төрөлд алтан медаль авсан ОХУ-ын залуу уран гулгагч Юлия Липницкая 200,57 оноотой тавдугаар байрт

Ванкуверийн олимпийн мөнгөн медальт, дэлхийн хоёр удаагийн аварга, дэлхийн аваргын мөнгө хүрэл медальт Японы алдарт уран гулгагч Мао Асада 198,22 оноогоор зургадугаар байрт

АНУ-ын уран гулгагч Эшли Вагнер 193,20 оноогоор долдугаар байрт