“Сүхбаатар SBL хасын хүлэгүүд” 12 хожилтойгоор улирлыг тэргүүллээ

Сагсан бөмбөгийн үндэсний супер лигийн энэ улирлын сүүлийн тоглолт буюу 3-р тойргийн сүүлийн тоглолт өчигдөр “Сүхбаатар SBL Хасын Хүлэгүүд” болон “Дорнод Танан Гарьд” багуудын хооронд боллоо.

Тоглолтын өмнө багууд ижилхэн 11 хожил, 6 хожигдолтой байсан. Тиймээс энэ тоглолтонд хожсон баг нь улирлын тэргүүн багаар тодрох байлаа. Танан Гарьд багаас энэ тоглолтонд Joe Davis, Г.Ихбаяр, О.Ууганбаяр нар бэртлийн улмаас оролцоогүй. Харин Гарьдуудын бүрэлдэхүүнд улирлын эхнээс нэр нь байсан ч, огт тоглоогүй байсан төвийн тоглогч М.Дорждавга, Энхгэрэл нар энэ улирлын эхний тоглолтондоо оролцлоо.

Тоглолт эхнээсээ тун өрсөлдөөнтэй ширүүн явагдаж, эхний хагаст Танан Гарьд баг 2-хон оноогоор илүүрхэж чадсан. Энэ тоглолтонд Гарьдуудаас Ц.Азбаяр 21 оноо, 5 самбар, 5 оновчтой дамжуулалт, Freddie Woods 19 оноо, 11 самбар, М.Отгонмөнх 16 оноо, Б.Мөнхболд 13 оноо, 7 самбар, 6 бөмбөг таслалт, С.Батбямба 7 оноо, 8 самбар, М.Дорждавга 9 онооо авчээ.

Харин SBL Хүлэгүүд тоглолтын сүүлийн хагаст тун сайн тоглосон. Тэднээс энэ тоглолтонд Т.Санчир 31 оноо, 5 самбар, Б.Билгүүн 20 оноо, 6 самбар, 3 блок, А.Бямбадорж 18 оноо, Чу Мадуабум 15 оноо, 6 самбар, О.Сэргэлэн 10 оноо, 6 оновчтой дамжуулалт, 6 самбар, Horace Bond 9 оноо, 8 самбар, 5 бөмбөг таслалт хийжээ. Улмаар энэ тоглолтонд 103:96 харьцаатай “Сүхбаатар SBL Хасын Хүлэгүүд” баг хүчтэй өрсөлдөгчөө буулган авлаа. Ингэснээр Хүлэгүүд баг улирлын 12 дахь хожлоо авч, улирлыг хожлоороо тэргүүллээ. Ийнхүү Үндэсний Супер Лигт 63 тоглолт болсоны эцэст, улирлын тоглолтууд амжилттай өндөрлөлөө. Улирлыг “Сүхбаатар SBL Хасын Хүлэгүүд” баг 12 хожилтой, 6 хожигдолтойгоор тэргүүлсэн. Харин 2-с 4-р байрны багууд бүгд 11 хожилтой, 7 хожигдолтойгоор тэнцсэн. Тиймээс хоорондын тоглолтоор байр шийдэгдэж, “Дорнод Танан Гарьд” баг 2-р байраар, “УБ Альянс Тех ШУТИС-н Харцага” 3-р байраар плэй-оффт шалгарч, хоорондоо учраа таарлаа.

Эдгээр багууд өнгөрсөн улиралд мөн л плэй-оффын эхний шатанд таарч байсан. Харин 4-р байраар “Баянгол Гурван Тамир” баг анх удаагаа плэй-оффт шалгарч, плэй-оффт Хүлэгүүдтэй тулахаар боллоо. Үндэсний Супер Лигийн плэй-оффын сэтгэл сэргээсэн тоглолтууд ирэх даваа гарагт эхлэнэ.

Б.Цэлмэг