Шилдгийн шилдэг харуусал дагуулж байна

Шилдгийн шилдгийг шалгаруулах үйл ажиллагаа хоёр хүний аминд хүрсэн харамсалтай хэрэг гарч олныг цочирдууллаа. Тодруулбал, өнгөрсөн өдрүүдэд байгууллагуудын шинэ жилийн баяр болж, албан газрууд байгууллагынхаа шилдэг ажилтдаа тодруулсаар. Улмаар шилдэг ажилтан болсон нэгнийхээ зүрхийг хөөргөж, архиар шахаж, эцэстээ тэд хорвоог орхив. Тухайлбал, Дорноговь аймгийн Сайншанд хотод 52 настай Б бизнесменүүдийн шинэ жилийн баярын цэнгүүнд оролцож согтууруулах ундаа хэтрүүлэн хэрэглэснээс гудамжинд осгож амиа алджээ. Б нь машиныхаа хажууд унаад босч чадалгүй байсаар осгож амиа алдсан гэх. Мөн Орхон аймгийн Баян-Өндөр суманд 34 настай эмэгтэй Б байгууллагынхаа тэргүүний ажилтан болсон орой осгож нас барсан юм. Түүнийг байгууллагын шилдэг ажилтан болсны дараа ажлын хамт олон нь уух ёстой хэмээн хөгжөөж, харсан хүн бүхэн шахуу архиар дайлж, нэг нь нэг, хоёр нь хоёр, дарга нь бүр гурван хундагыг нэг дор тулган баяр хүргэж байсан гэх. Архи, дарс нэг их хүртээд байдаггүй тэрээр баярласандаа болоод өгсөн бүгдийг нь уучихаж. Ингээд хөл дээрээ ч тогтож чадахгүй болтлоо согтож, өндөр өсгийтэй туфль, шилэн тирко, үдэшлэгийн даашинзныхаа гадуур өвлийн хүрмээ өмсөөд, цахилгааныг нь ч татаж чадалгүй, баярын бичиг, дурсгалын зүйлсээ барин гарч, 80 гарсан ээж, гурван хүүхдээ орхин мөнх бусыг үзүүлсэн юм. Гэтэл үүнтэй адил хэрэг Нийслэлд ч гарав. Тодруулбал, Баянзүрх дүүргийн 17 дугаар хороонд 31 настай эрэгтэй дан өмд, пиджактай шилдэг ажилтан гэх өргөмжлөлөө тэвэрсээр амиа алдсан байжээ. Энэ мэтчилэн бидний баяр цэнгэл харуусал, зовлон, үхэл дагуулсаар байна.

Шинэ жил болоход 11 хоног үлджээ. Энэ өдрүүдэд бүх л албан газар шинэ жилээ тэмдэглэж, шилдгийн шилдгээ шалгаруулна. Тиймээс сэрэмжлүүлэх үүднээс уг мэдээллийг хүргэж байна. Мэдээж бусдын гарт бус, хэн нэгний буруугаас биш шинэ жил, элдэв тэмдэглэлт ойн баяр тэмдэглэж яваад амиа алдаж байгаа нь харамсалтай, эмгэнэлтэй явдал. Монгол Улсын Ерөнхийлөгчийн сүүгээр баяр наадмаа тэмдэглэхийг дэмждэггүй юм гэхэд архиа тааруулж уухыг зөвлөж байна.

Б.Золбоо