Спортын шилдгүүдийг зарлалаа

Монголын спортын сэтгүүлчдийн холбоо энэ жилийн спортын шилдгүүдийг зарлалаа. Тус холбооны гишүүдийн саналаар тодруулдаг шилдгийн шилдэгт энэ жил 27 тамирчин, 4 баг, 10 дасгалжуулагчийг нэр дэвшсэн юм.

Санал асуулгад МССХ-ны гишүүн, спортын сэдвээр дагнан бичдэг 116 сэтгүүлч оролцож, саналаа ирүүлсэн байна. Өмнө нь энэхүү саналаар тодорсон тамирчдыг тухайн жилийн “Бөртэ чоно” наадам дээр зарлан, тодруулдаг байсан бол энэ удаа МССХ шилдэг 7 тамирчин, нэг баг, гурван дасгалжуулагчийн нэрсийг урьдчилан зарлаж, шилдгийн шилдэг гурван тамирчин, “Бөртэ чоно”-ын эзэн дасгалжуулагчийн нэрсийг нууц хэвээр үлдээлээ. Оны шилдгийн шилдэг болох өрсөлдөөний ялагчид арванхоёрдугаар сарын 23-нд болох МҮОХ-ны оны тэргүүн дээд шагнал гардуулах “Бөртэ чоно” ёслолын үеэр олон нийтэд ил болох юм.

Спортын сэтгүүлчдийн саналаар тодруулсан шилдэг ТАМИРЧИД:
/Нийт 27 тамирчин нэр дэвшсэн/

10. Готовдоржийн ӨСӨХБАЯР /Уулын спорт/
Хойд туйлын 90 градус, дэлхийн зулайд хөл тавьсан анхны монгол хүн.
9. Гунаажавын ЭРХЭМБАЯР /Үндэсний бөх/
Ардын хувьсгалын 92 жилийн ой, Үндэсний их баяр наадамд түрүүлсэн.
8. Эрдэнэчимэгийн СУМЪЯА /Чөлөөт бөх/
Бөхийн чөлөөт барилдааны ДАШТ-ий мөнгөн медальт.
7. Бат-Очирын Сэр-Од /Хөнгөн атлетик/
Ази тивийн аварга, Зүүн Азийн наадмын мөнгөн медальт.
6. Очирбатын Насанбурмаа /Чөлөөт бөх/
ДАШТ-ий хүрэл, Дэлхийн оюутны Универсиад наадмын хүрэл медальт, Ази тивийн аварга.
5. Ганзоригийн Мандахнаран /Чөлөөт бөх/
ДАШТ-ий хүрэл, Дэлхийн оюутны Универсиад наадмын хүрэл, Азийн АШТ-ий мөнгөн медальт.
4. Дашдаваагийн Амартүвшин /Жүдо бөх/
ДАШТ-ий мөнгөн медальт.

/Оны шилдгүүдийг тэргүүлсэн эхний гурван тамирчны нэр болон “Бөртэ чоно” шагналын эзэн тамирчныг арванхоёрдугаар сарын 23-нд болох “Бөртэ чоно” ёслол дээр тодруулна/.

Спортын сэтгүүлчдийн саналаар тодруулсан шилдэг БАГ:
/Нийт 4 баг нэр дэвшсэн/

Азийн АШТ-ий мөнгөн медаль хүртсэн Эмэгтэй сагсан бөмбөгийн шигшээ баг.

Спортын сэтгүүлчдийн саналаар тодруулсан шилдэг ДАСГАЛЖУУЛАГЧ:
/Нийт 10 дасгалжуулагч нэр дэвшсэн/

Буяндэлгэрийн Батбаяр (Эмэгтэй чөлөөт бөхийн ҮШБ-ийн ахлах дасгалжуулагч)

Зэвэгийн Дүвчин (Чөлөөт бөх. ДАШТ-ий мөнгөн медальт С.Батцэцэг, Э.Сумьяагийн үндсэн дасгалжуулагч)

Шархүүгийн Цэвэлмаа (Жүдо бөхийн ҮШБ-ийн ахлах дасгалжуулагч, дэлхийн аварга М.Уранцэцэгийн үндсэн багш)

/Эдгээр дасгалжуулагчдаас хэн нь шилдгийн шилдгээр тодорч, “Бөртэ чоно” шагналын эзэн болохыг арванхоёрдугаар сарын 23-нд болох “Бөртэ чоно” ёслол дээр зарлана./