22-ын товчооны зам засварын ажил есдүгээр сард дуусна гэв

Нийслэлийн Сонгинохайрхан дүүрэг, Моносын уулзвараас баруун аймаг руу салдаг тойрог хүртэл нийт 9,3 км авто замыг шинэчилж буй. Өнөөдрийн байдлаар тус ажил 70 хувьтай үргэлжилж байгаа талаар Нийслэлийн замын хөгжлийн газраас мэдээллээ.

Тодруулбал "Сонгинохайрхан дүүргийн урсгал засварын ажил 2024 оны дөрөвдүгээр сарын 1-нээс эхэлсэн. Арваннэгдүгээр сарын 31-н хүртэл үргэлжилнэ. Шинэчлэлтийн ажлын хүрээнд Сонгинохайрхан дүүргийн хоёр байршилд замын засвар шинэчлэлтийн ажил хийгдсэн. Эхний байршил нь Цэргийн хотхоноос хойшоо Тахилтын уулзвар хүртэлх 2.3 км авто замыг шинэчилж ашиглалтад оруулсан. Хоёрдугаарт 22-ын товчооны 9.3 км зам авто замын ажил байгаа. Үндэсний их баяр наадамтай холбоотойгоор тухайн замд суурь хучилт хийгээд зорчих хөдөлгөөнийг нээсэн. Харин одоо чулуун хашлага суурилуулах ажил 70 хувьтай үргэлжилж байна. Дараа долоо хоногоос замын эхний хэсэгт өнгө хучилтын ажил хийж эхэлнэ. Тэгэхээр есдүгээр сарын 1-н гэхэд 22-ын товчооны замын засварын ажил бүрэн дуусна гэж бодож байна" гэв.

Авто зам шинэчлэлийн ажилд Нийслэлийн замын сангийн хөрөнгөөс 37 тэрбум төгрөг зарцуулж буй. Энэ жилийн хувьд Үндэсний их баяр наадмын өмнө 17 байршилд авто замын шинэчлэл хийхээр төлөвлөснөөс 14 байршилд засвар, шинэчлэлийн ажил хийж дууссан байна.

Тодруулбал, Намъяанжүгийн гудамж, Амгалангийн зам, УБЦТС-ийн баруун талын зам, Богд уулын арын зам, Зайсангийн уулзвараас "Буган халиун" хүртэлх зам, Соёолжоос Нарны замын уулзвар хүртэлх зам, Төмөр замаас хойш Энхтайвны өргөн чөлөө хүртэлх зам, Хилчний гудамж буюу Цагдаагийн академийн хойд зам, СУИС-ийн уулзварын зүүн талын зам, Нарантуул захаас Өгөөмөр захын уулзвар хүртэлх зам, Чингэлтэй дүүргийн дөрөвдүгээр хороо буюу тавдугаар сургуулийн уулзвараас Их сургуулийн гудамж хүртэлх авто замуудын тус тус шинэчилсэн байна.