Сэлэнгэ: Адууны эрэлд явсан хүүгийн цогцосыг "Орхон" голоос олжээ

Сэлэнгэ аймгийн Сайхан сумын Номгон багийн “Хавцал” гэх газарт наймдугаар сарын 12-ны өдрийн 12:00 цагийн орчим адууны эрэлд явсан М нь сураггүй болсон бөгөөд унаж явсан морь нь гэрийнхээ гадаа гүйж ирсэн байна. Эл дуудлагыг ОБГ тухайн өдрийн 17:30 цагт хүлээн авсан аж.

Улмаар тус аймгийн ОБГ-ын Эрэн хайх, аврах анги, Сайхан сум дахь Гал түймэр унтраах, аврах 61 дүгээр анги, Дархан-Уул аймгийн ОБГ-ын Эрэн хайх, аврах анги, Зэвсэгт хүчний 330 дугаар ангийн алба хаагчид хамтран наймдугаар сарын 15-ны өдрийн 06:10 цагаас тус сумын харьяат М /15 настай, эрэгтэй/-ыг эрэн хайх ажиллагааг эхлүүлжээ.

Эрэн хайх ажиллагааны явцад 08.15-ны өдрийн 10:11 цагт тус аймгийн Хушаат сумын “Товуухан” гэдэг газарт “Орхон” голын эргийн усны мандлаас цогцсыг олж, гарган Сайхан сум дахь сум дундын Цагдаагийн хэлтсийн Эрүүгийн тасагт шилжүүлэн өгсөн байна.