I ангилалд бүртгэлтэй, ХК-иудын ТУЗ-ийн гишүүдийн сургалт хангалтгүй байна

Компанийн засаглалын кодексийн үнэлгээний тайланг танилцуулав. Хөрөнгийн биржид бүртгэлтэй, нээлттэй хувьцаат компаниудын энэ оны эхний хагас жилийн тайланг санхүүгийн Зохицуулах хорооны Компанийн засаглал, комплайнсын хэлтэс гаргасан байна.

Компанийн засаглалыг нэвтрүүлэх нь бизнесийн үйл ажиллагааны урт хугацааны өгөөжийг хангах, хөрөнгө оруулагч, үйлчлүүлэгчдийн хүлээлтэд суурилсан шударга, нээлттэй зах зээлийн орчин бүрдэхэд эерэг нөлөөтэй.

Олон улсын практикийн дагуу компанийн засаглалын чанар, кодексийн хэрэгжилтийг үнэлэхдээ эрсдэлийн үнэлгээний үр дүнд үндэслэн зэрэглэл тогтоох аргыг ашиглажээ. Компанийн засаглалын зэрэглэл нь тухайн компанийн үйл ажиллагаанд эрсдэлийн дүн шинжилгээ хийх мэдээлэл болж, хөрөнгө оруулагч, үйлчлүүлэгчийн эрсдэлгүй шийдвэр гаргалтад тусалдаг юм.

СЗХ-ны Компанийн засаглал, комплайнсын хэлтэс 108 хувьцаат компанид анхны үнэлгээг хийжээ.Эдгээрээс Хөрөнгийн биржийн I ангилалд бүртгэлтэй, ХК-иудын үр дүнг танилцуулъя.

• Нэгдүгээр ангилалд бүртгэлтэй компаниуд 18.4,
• Хоёрдугаар ангилал 14.9,
• Гуравдугаар ангиллын үзүүлэлт 4.8 хувиар тус тус өсжээ.    

Тайланд хувьцаат компаниудын ТУЗ, түүний дэргэдэх хороодын үйл ажиллагаа, бүтэц, бүрэлдэхүүн, дотоод эрх зүйн зохицуулалын ил тод байдал /цахим хуудасны шинэчлэл/,  бодлогын баримт бичиг, ёс зүйн дүрэм, компанийн дүрэм, дотоод үйл ажиллагааны журам, мэдээллийн ил тод байдал, тайлагнал, комплайнсын хяналт, эрсдэлийн удирдлагын журам, заавар, компанийн эрх бүхий албан тушаалтнуудад зориулсан сургалтын хөтөлбөр болон хамгийн сайн болон муу хэрэгжсэн засаглалын үзүүлэлтүүдийг багтаажээ.

Нэгдүгээр ангиллын ХК-иудын ТУЗ-ийн бүрэлдэхүүн 9-12 гишүүнтэй, 44 хувь нь хараат бус гишүүд байна. Нийт ТУЗ-ийн гишүүдийн 28 хувийг эмэгтэйчүүд эзэлжээ.

“Компанийн засаглалын кодекс”-ийн хэрэгжилтийн үнэлгээ нь ангилал өндөр байх тусам өндөр байна. Мөн тухайн компанийн үнэлгээ өсөх тусам компанийн засаглал нь сайн дүнтэй байгааг дараах зургаас харж болно.

Компанийн засаглалын кодексийн хэрэгжилтийн тайланг өмнөх тайлантай харьцуулбал дараах байдлаар ахиц гарчээ.

2022 онд нэгдүгээр ангиллын ХК-иудын ТУЗ дунджаар 16 удаа хуралдаж, хурлын ирц нь 92 хувь байжээ. Хэлэлцсэн асуудлын дундаж тоо 46 байсан байна. Нэгдүгээр ангилалд нийт  27 ХК бий. Тэдний 30 хувь нь л цахим хуудсандаа бүрэн мэдээлэл байршуулжээ. 54 хувь нь дутуу мэдээлэл байршуулж, 8 хувь нь цахим хуудсаа шинэчилж, 8 хувь нь цахим хуудасгүй байна.

Энэ оны хагас жилийн байдлаар 92 хувь компанийн дүрмээ цахим хуудсандаа байршуулж, 56 хувь дотоод дүрэм, журмаа нээлттэй болгожээ.

ХӨРӨНГИЙН БИРЖИД БҮРТГЭЛТЭЙ, НЭГДҮГЭЭР АНГИЛЛЫН ХК-ИУД

№	Симбол	Компанийн нэр
1	APU	АПУ ХК
2	AIC	Ард Даатгал ХК
3	ADB	Ард кредит ББСБ ХК
4	AARD	Ард санхүүгийн нэгдэл ХК
5	BDS	Би ди сек ХК
6	BOGD	Богд Банк ХК
7	BODI	Бодь Даатгал ХК
8	GAZR	Газар Шим Үйлдвэр ХК
9	GOV	Говь ХК
10	GLMT	Голомт Банк ХК
11	NEH	Дархан нэхий ХК
12	INV	Инвескор ББСБ ХК
13	LEND	ЛэндМН ББСБ ХК
14	MNDL	Мандал Даатгал ХК
15	MMX	Махимпекс ХК
16	MIK	Мик холдинг ХК
17	MNP	Монгол шуудан ХК
18	MSE	Монголын хөрөнгийн бирж ХК
19	MFC	Монос хүнс ХК
20	SUU	Сүү ХК
21	TTL	Таван толгой ХК
22	TCK	Талх чихэр ХК
23	SBM	Төрийн Банк ХК
24	TUM	Түмэн шувуут ХК
25	KHAN	Хаан банк ХК
26	XAC	Хас Банк
27	TDB	Худалдаа Хөгжлийн банк

Та хувьцаа, бонд авах замаар хөрөнгийн зах зээлд оролцохоор төлөвлөж байгаа бол дээрх үзүүлэлтүүдийг анхааралтай уншаарай.

Аль нэг компанийг сонгон хөрөнгө оруулахдаа тухайн компанийн ашиг, борлуулалт, зах зээлд эзлэх хувь зэргийг хамгийн түрүүнд хардаг. Тэгвэл компанийн засаглал буюу ТУЗ-д хэн багтсан, тэд хэрхэн ажилладаг, мэдээлээ ил байршуулсан эсэх, бүх мэдээллээ хуваалцдаг уу зэрэг нь компанийн ашигт ажиллагаанд шууд бусаар нөлөөлдөг, чухал үзүүлэлтүүд юм.