Стандартын шаардлага хангахгүй 2523 нүхэн жорлон байна

• Аялал жуулчлалыг хөгжүүлэх үндэсний хорооны II хуралдаан өнөөдөр боллоо.
• Хурлаар аялал жуулчлалын салбарт хэрэгжүүлж буй ажлын явц, үр дүн, тулгамдаж буй асуудал, Засгийн газраас зарласан “Монголд зочлох жил”-ийн хүрээнд аялал жуулчлалын салбарт өрнөсөн үйл явдлуудаас танилцууллаа.
• Стандартын шаардлага хангахгүй 2523 нүхэн жорлон байна.

Хуралдаанд Ерөнхий сайд, Аялал жуулчлалыг хөгжүүлэх үндэсний хорооны дарга Л.Оюун-Эрдэнэ, Байгаль орчин, аялал жуулчлалын сайд Б.Бат-Эрдэнэ, Соёлын сайд Ч.Номин, Нийслэлийн Засаг дарга бөгөөд Улаанбаатар хотын Захирагч Д.Сумъяабазар,  аялал жуулчлалын чиглэлээр үйл ажиллагаа эрхэлдэг аж ахуйн нэгж, төрийн бус байгууллагын төлөөллүүд оролцсон юм.

Аялал жуулчлалыг дагасан түр отоглох цэг, зам дагуух үйлчилгээний цогцолбор, стандартад нийцсэн ариун цэврийн байгууламжийг хөндөв. 170-250 км зайтай 69 байршилд, зам дагуу үйлчилгээний цогцолбор байгуулах шаардлагатай гэх тооцоо гарчээ.

Эдгээрээс нэг цогцолбор 100 хувь ашиглалтад орж, дөрвөн цогцолборын ажил энэ онд дуусах төлөвлөгөөтэй байна. Байгалийн үзэсгэлэнт газруудад нийт 118 отоглох цэг байгуулах боломжтойгоос 34 байршилд байгуулжээ.

Хөрсний бохирдлоос сэргийлэх, “Монголд зочлох жил”-ийн хүрээнд 21 аймгийн аялал жуулчлалын бүсэд стандартын шаардлага хангахгүй 2523 нүхэн жорлон байна. Ийнхүү 2022-2023 онд 1613 жорлонг буулгаж, Нүхэн жорлон, угаадасны нүх MNS5924:2015 стандартын дагуу нийт 502 эко жорлон болон хуурай технологийн ариун цэврийн байгууламж барьсан талаар албаныхан дурдаж байлаа.

Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Улаанбаатар хот бол Монгол Улсын эдийн засгийн гол цөм. Тиймээс Ерөнхий сайдын санаачилсан “Монголд зочлох жил”-тэй уялдуулан зуны болон өвлийн аялал жуулчлалыг эрчимтэй хөгжүүлж, салбар бүрийг хөгжүүлэх бодлогуудыг урьд хожид байгаагүйгээр өргөн хүрээнд хэрэгжүүлэхээр ажиллаж байгаа.

Мөн Улаанбаатарт их хэмжээний хөрөнгө оруулалтыг эрчимтэй татаж, хотын түгжрэл, агаарын бохирдлыг шийдэх хэрэгтэй. Тэгж чадахгүй бол өвлийн аялал жуулчлал, хот руу чиглэсэн аялал жуулчлал хөгжихөд хүндрэлтэй. Түүнчлэн хотын эргэн тойронд аялал жуулчлалын бүсийг хөгжүүлж, замбараагүй газар олголт болон зөвшөөрөлгүй хашаа татаж, барилга барьдаг асуудлыг цэгцлэх хэрэгтэй байна” гэлээ.

Мөн тэрбээр “Дотооддоо үйлдвэрлэж буй бүтээгдэхүүний орц найрлага, давуу тал, хэрэглэх заавар гэхчлэн бүтээгдэхүүний шошгыг олон орны хэл дээр тайлбарлан бичих хэрэгтэй. Жижиг асуудал мэт боловч жуулчдыг хамгийн их төөрөгдүүлдэг зүйл” хэмээж байв.

Аялал жуулчлалын салбарт хамгийн оргил үе нь 5-10 дугаар сарын хооронд байдаг бөгөөд жуулчдын 71 хувь нь энэ үеэр ирдэг байна. Харин өвлийн аялал жуулчлалын тухайд 10.2 хувь нь 11-12 дугаар сард, 18.8 хувь нь 1-4 дүгээр сард ирдэг гэх судалгаа гарчээ.

                                     НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС