Манай шигшээ баг жүдогийн ДАШТ-д III-т бичигдэж байна

Бразилийн Рио Де Жанейро хотод үргэлжилж байгаа жудо бөхийн насанд хүрэгчдийн ДАШТ-ий эрэгтэйчүүдийн 73, эмэгтэй 57 кг-ийн жинд медальтнууд өчигдөр тодорлоо. Энэ өдөр манай улсын 3 жудоч дэлхийн аваргын татамид зодоглосоноос МУГТ Ням-Очир 5-р байрт шалгарлаа.

Өчигдөр Монголын хоёр ч шилдэг жүдоч дэлхийн аваргын татамид хүч сорьсон ч медалийн тавцанд гарч чадсангүй. Тэмцээний хуваарийн дагуу өчигдөр эрэгтэйчүүдийн 73 кг, эмэгтэйчүүдийн 57 кг-ын жингийн барилдаан болж, 73 кг-д Хөдөлмөрийн баатар, Гавьяат тамирчин Х.Цагаанбаатар, Гавьяат тамирчин С.Ням-Очир нар, харин 57 кг-ын жингийн ангилалд ОУХМ Д.Сумъяа нар хүч сорилоо.

Лондонгийн олимпийн хүрэл медальт С.Ням-Очир шагналт 5-р байрт шалгарлаа. Тэмцээний хуваарийн дагуу өнөөдөр эрэгтэйчүүдийн 81 кг, эмэгтэйчүүдийн 63 кг-ын жингийн барилдаан болно.

81 кг-ийн жинд зодоглох ОУХМ Отгонбаатарын Ууганбаатар В хэсэгт сугалаа татаж тэрээр эхний тойрогтоо хийлж 2-р тойрогтоо БНХАУ-ын бөх Занг Вентаотой барилдах бол эмэгтэй 63 кг-ийн жинд А хэсэгт сугалаа татсан ОУХМ Цэнд-Аюушын Цэрэннадмид эхний тойрогтоо хийлж дараагийн даваанд Итали, БНХАУ-ын аль ялсантай хүч үзнэ.

Харин энэ жинд С хэсэгт сугалаа татсан ОУХМ Балдоржийн Мөнгөнчимэг эхний тойрогтоо урд хөршийн бөх Күи Жингжингтэй барилдах бол манай тамирчин өрсөлдөгчөө ялбал дараагийн тойрогтоо БНАСАУ-ын бөхтэй барилдана.

Бразилийн Рио Де Жанейрогийн татамид дэлхийн 123 ороны бөхчүүд өрсөлдөж байгаагаас өнөөдрийн байдлаар Япон улсын баг тамирчид 3 алт, 1 мөнгө, 1 хүрэл 1 тавдугаар байртайгаар бусад орныг тэргүүлж явна.

Түүний араас тэмцээнийг зохион байгуулагч эзэн орны баг тамирчид 1 аль, 1 мөнгө, 1 хрэл 1 5-р байртайгаар удаалж байгаа бол Монгол улсын баг 1 алт, 1 мөнгө,5-р байртайгаар 3-т бичигдэж байна.