“Turquoise Hill Resources” компанийн орлого 245.6 сая ам.долларт хүрчээ

"Оюу Толгой” ХК-ийн хөрөнгө оруулагч “Turquoise Hill Resources” компани энэ оны эхний улирлын санхүү, үйл ажиллагааны тайлангаа танилцууллаа. I улирлын эцэс гэхэд тус компанийн бэлэн мөнгөний урсгал 14.7 сая ам.доллар болсон байна.

2018 оны I улиралд “Оюу Толгой”-д 38.8 мянган тонн зэс, 42 мянган унц алт бүхий баяжмал боловсруулжээ. Зэсийн ханш өндөр байсан болон алтны агууламж зэргээс хамаарч оны эхний улиралд орлого нь 245.6 сая ам.доллар болж, 2017 оны мөн үеэс 3.4 хувиар өссөн талаар “Turquoise Hill Resources” компани мэдээллээ. Тус компани “Оюу Толгой” төслөөс 2018 онд нийт 125-155 мянган тонн зэс, 240-280 мянган унц алт бүхий баяжмал боловсруулахаар төлөвлөж байгаа ажээ.

I улирлын эцсийн байдлаар “Оюу Толгой” төсөлд нийт 14 мянган хүн ажиллаж байгаагийн 94 хувь нь монголчууд байна. I улиралд “Оюу Толгой”-ийн гүний уурхайн бүтээн байгуулалтад 270.5 сая ам.доллар зарцуулжээ. Харин гүний уурхайн бүтээн байгуулалтыг 2016 онд эхэлснээс хойш нийт 1.4 тэрбум ам.доллар зарцуулаад байгаа аж. “Ажил амжилттай үргэлжилж байгаа” гэдгийг “Turquoise Hill Resources” компани мэдээлж байна.

Үүнээс гадна Татварын ерөнхий газар “Оюу Толгой” ХХК-д 155 сая ам.долларын татварын акт тавьсан юм. Үүнээс таван сая ам.долларыг нь “Оюу Толгой” ХХК хүлээн зөвшөөрч төлжээ. Харин үлдсэнийг нь хүлээн зөвшөөрөхгүй байгаа учраас хөрөнгө оруулалтын гэрээнд заасны дагуу маргаан шийдвэрлэх хүсэлтийг Засгийн газарт хүргүүлсэн байна. Хэрэв ажлын 60 хоногт нэгдсэн шийдэлд хүрч чадахгүй бол Олон улсын арбитрт хандах боломжтой гэдгийг “Turquoise Hill Resources” компани тайландаа дурджээ.