Дэлхийн хамгийн баян хүнийг нэрлэв

Америкийн телевизийн CNN суваг “Amazon” компанийг үндэслэгч Жефф Безосыг түүхэн дэх хамгийн баян хүнээр тодруулсан байна. “Блумберг” агентлагийн гаргасан тэрбумтнуудын жагсаалтаас үзвэл, 2018 оны нэгдүгээр сарын 9-ний байдлаар түүний хөрөнгө 105 тэрбум доллараар үнэлэгдэж байгаа ажээ.

“Amazon” компанийн хувьцааны үнэ өссөнөөр Безосын хөрөнгө нэмэгдсэн байна. 2018 оны эхний өдрүүдэд хувьцааны өртөг нь 6,62 хувиар өсч, нэгж хувьцааны үнэ 1,3 мянган доллар болжээ.

Телевизийн сувгийн дурдсанаар, Безос “Microsoft” корпорацыг үндэслэгч Билл Гейтсийн тогтоосон дээд амжилтыг эвдсэн байна. “Блумберг” агентлаг, “Форбс” сэтгүүлийнбичсэнээр Гейтсийн хөрөнгө 1999 онд 100 гаруй тэрбум доллар байжээ.Гэвч үүнээс хойш хөрөнгө нь багасч эхлэсэн бөгөөд сүүлчийн мэдээгээр, 93,3 тэрбум доллар болсон байна.

Безос 1994 онд “Amazon” компанийг үүсгэн байгуулсан бөгөөд 2016 онд компанийн эргэлт 136 орчим тэрбум доллар болсон байна.

“Amazon”-ы хувьцааны зэрэгцээ Безос “Вашингтон пост” сонин болон сансрын хөлгийн талаар ажилладаг “Blue Origin” компанийг эзэмшдэг юм.

С.Инда