100 буудалт даамын УАШТ өндөрлөлөө

Сүхбаатар аймгийн Баруун-Урт хотод 100 буудалт даамын Улсын аварга шалгаруулах шигшээ тэмцээн тавдугаар сарын 20-26-ны өдрүүдэд болж өнгөрлөө. Тэмцээнд эрэгтэй 11, эмэгтэй есөн даамчин өрсөлдлөө. Тэмцээний эрэгтэйчүүдийн ангилалд ОУИМ Г.Ганжаргал, эмэгтэйчүүдийг ОУИМ Э.Мандахнаран нар тэргүүллээ. ОУИМ Г.Ганжаргалын хувьд Улсын аваргад зургаа дахь удаагаа түрүүлж байгаа бол, өнгөрсөн сард Узбекстаны Ташкент болсон Азийн аваргад түрүүлж, их мастерийн болзол хангасан Э.Мандахнаран улсын аваргын хоёр дахь түрүүгээ хүртлээ. Эрэгтэйчүүдээс мөнгө, хүрэл медалийн болзлыг спортын мастер С.Даваадорж, олон улсын их мастер Д.Эрдэнэбилэг нар хүртээд байна. Эмэгтэй мөнгөн медалийг тэмцээний хамгийн залуу оролцогч 13 настай дэд мастер Г.Хэрлэнмөрөн /Азийн өсвөрийн мөнгө, хүрэл/, хүрэл медалийг спортын мастер М.Хишигбаяр хүртлээ.

Тэмцээний шилдэг өргийн эзнээр спортын мастер Э.Энх-Эрдэнэ тодорсон байна. Түүний 2007 оны өсвөрийн дэлхийн аварга ДДХМ Г.Гэрэлболдтой хийсэн тоглолт энэ тэмцээний хамгийн уран өргөөр шалгарчээ. Даамчидыг ирэх сараас эхлэн өсвөр болон насанд хүрэгчдийн Дэлхийн аварга шалгаруулах тэмцээн хүлээж байна. Ирэх зургадугаар сарын 02-20-ны өдрүүдэд ОХУ-ын Уфа хотод эрэгтэйчүүдийн Дэлхийн аварга шалгаруулах тэмцээн болох бөгөөд тус тэмцээнд монголоос хоёр даамчин оролцох юм. Өнгөрсөн жилийн Азийн аваргад түрүүлсэн их мастер Г.Ганжаргал, рейтингээрээ дэлхийн аваргад оролцох эрхээ авсан их мастер Д.Эрдэнэбилэг Ази тивийг төлөөлөн оролцох гэж байна. Мөн ирэх зургадугаар сарын 28-нд Франц улсын Тур хотод 17 хүртэлх насны өсвөрийн ДАШТ болох бол эх орноо төлөөлөн “Ажнай корпораци”-ийн тамирчин Ц.Отгонбилэг оролцоно. Энэ онд Улаанбаатар хотод эмэгтэйчүүдийн ДАШТ зохиогдохоор болсон. Ирэх аравдугаар сард манай улсад болох энэ тэмцээнд өнгөрсөн жилийн Азийн аварга ОУИМ М.Нямжаргал болон энэ оны Азийн аваргад түрүүлж, мөн улсын аваргад түрүүлээд байгаа ОУИМ Э.Мандахнаран нар өрсөлдөх юм.Ингээд МДХ энэ оны УАШТ-ийг орон нутагт амжилттай зохион байгуулав. Харин даамчид дараагийн зогсоол болох олон улсын тэмцээний бэлтгэлдээ залгуулан гарч байна.

А.Алт