Нийслэлээс бичил бизнесийн 219 төсөлд 939 сая төгрөгийн санхүүжилт олголоо

Нийслэлийн Засаг даргын санаачилсан “Бичил бизнесийг дэмжих ядуурлыг бууруулах нийслэлийн хөтөлбөр”-ийг Нийслэлийн ИТХ-ын 16/17 тоот тогтоолоор баталсан. Энэ хүрээнд нийслэлийн 152 хороонд Хадгаламж зээлийн хоршоод байгуулагдан барьцаа хөрөнгийн дутагдалтай бичил бизнес эрхлэгчдэд санхүүгийн үйлчилгээ авах боломж нээгдэх, ажлын байр бий болох, иргэд хоршиж бизнесээ хөгжүүлэх, хамтарч нийгмийн асуудлаа шийдэх боломжтой болсон төдийгүй Хадгаламж зээлийн хоршоод бий болсон.

Харин 12 дугаар сарын 30-ны өдөр Бичил бизнесийг дэмжих сангаас тусгай зөвшөөрлөө авсан эхний 10 Хадгаламж зээлийн хоршоодтой хамтран ажиллах батламж гардуулах ёслолын арга хэмжээ боллоо. Энэхүү үйл ажиллагаанд нийслэлийн Засаг дарга бөгөөд Улаанбаатар хотын Захирагч Э.Бат-Үүл, Засаг даргын Хөдөлмөр эрхлэлт, нийгмийн хамгааллын асуудал хариуцсан орлогч Ц.Буяндалай, Хөдөлмөрийн газрын дарга Н.Тунгалаг болон Хадгаламж зээлийн хоршоодын төлөөлөл оролцлоо. Нийслэлийн Засаг дарга ёслолын ажиллагааг нээж хэлсэн үгэндээ “Иргэд өмнө нь өөрсдөө сууж байгаад зээлээ шийддэг хөрөнгө мөнгө байхгүй байсан. НИТХ-аар нэг хороонд 100 саяар төсөвлөн нийт 15,2 тербум төгрөг батлуулсан. Харин ийм сайхан боломжийг ашиглан санхүүжилтийнхээ эрхийг нээлгэсэн эхний 10 хоршоонд батламж гардуулах гэж байна. Та бүхэн маань цаашдаа амжилттай ажиллавал Жижиг дунд үйлдвэрийн төсөлд хамрагдах боломжтой. Харин бичил зээл амжилтгүй хэрэгжвэл зогсоохоос өөр аргагүй амжилт хүсье” гэлээ. Одоогоор нийслэлийн 152 хороонд 202 удаагийн сургалт зохион байгуулж 12031 иргэнд мэдээлэл зөвлөгөө өгснөөр 125 хороо Хадгаламж зээлийн хоршоог шинээр үүсгэн байгуулж, 22 хоршоо Санхүүгийн зохицуулах хорооноостусгай зөвшөөрөл авчээ. Бичил бизнесийг дэмжих сангаас тусгай зөвшөөрлөө авсан 10 Хадгаламж зээлийн хоршооноос ирсэн 219 төсөлд 939.9 сая төгрөгийн санхүүжилтийг олгосон байна.