Дэлхийн хамгийн намхан залуу

28 настай залуу дэлхийн хамгийн намхан хүн гэх дээд амжилтын шинэ эзэн болжээ. Эдвард Эрнандес гэдэг энэ залуугийн мөрөөдөл нь их энгийн гэнэ. Тэрбээр өөрийн гэсэн ферм, найз бүсгүй болон жийптэй болохыг хүсдэг байна. Түүний мөрөөдөл их энгийн, боломжийн мэт санагдаж болох ч Колумбийн ядуусын дүүрэгт амьдардаг Эдвардын хувьд энэ нь бараг бүтэшгүй зүйл билээ. Учир юунд вэ гэвэл, энэ залуугийн биеийн өндөр ердөө 70 сантиметр юм.

Таван жилийн өмнө Эдвард өөрийн хувь тавилантай эвлэрч чадахгүй ихэд бухимдаж байсан гэнэ. Эргэн тойронд байгаа хүмүүс бүгд өсөөд байхад тэрбээр цэцэрлэгийн хүүхэд шиг л харагддаг байсан аж. Мань эр бусад хүмүүс түүнийг дооглон шоолж, дээрэлхэнэ гэдгээс эмээгээд ихэнхи цагийг гэртээ өнгөрүүлдэг байжээ. Тэрбээр 20 гаруй настай ч хүмүүс түүнтэй хүүхэдтэй харьцаж байгаа юм шиг ярилцдаг байв.

Гэвч нэг л өдөр түүний амьдрал эрс өөрчлөгджээ. 2010 онд БНХАУ-д дэлхийн хамгийн намхан хүн таалал төгссөн учраас Эрнандес руу Гиннесийн амжилтын номын ажилтнууд утасдсан гэнэ. Тэд хүрч ирээд Эдвардыг хэмжсэн аж. Ингэснээр энэ залуу шинэ дээд амжилтын эзэн болжээ.