Талийгаач Ж.Мөнхчимэг “Ж.Мягмардоржтой амьдрахгүй” гэдэг байжээ

Дархан-Уул аймгийн цагдаагийнхан хүн амины хэргийг үгсэн дарагдуулсан уу

Бид өмнөх 2014 оны хоёрдугаар сарын 19-ний өдрийн 032 дугаартаа “Дар­­хан-Уул аймгийн цаг­даа­­гийнхан хүн амины хэр­гийг үгсэн дарагдуулсан уу” гэх гарчигтай сурвалжлага хүргэсэн билээ.

Өнгөрөгч есдүгээр сард Дархан-Уул аймгийн Дархан су­мын нутаг дэвсгэрт 25 нас­тай эмэгтэй найз залуу­гийнхаа гэрт учир битүүлгээр амиа алдсан. Талийгаач Ж.Мөнхчимэг амиа алда­хаасаа өмнө эгч болон найз руу­гаа залгаж “Манай найз залуу Ж.Мягмардорж на­майг алах гээд байна” гэж хэлсэн байдаг.

Хэргийг шалгасан мөрдөн байцаагч талийгаачийг “Гад­ны нө­лөөгүй нас барсан” гэж үзсэн бол ар гэрийнхэн нь охиноо “Найз залуу Ж.Мягмар­дор­жийнхоо гарт амиа алд­сан” гэж хардаж байгаа юм.

Ямартай ч бид талийгаач Ж.Мөнхчимэгийн үхэлд ямар нэгэн сэжмээр холбоотой байж болзошгүй гэх найз залуу Ж.Мягмардоржийн талаарх мэдээллийг цуг­луулах үүднээс түүнтэй ойр дотно явсан хэд хэдэн хүнтэй уулзсан. Хачирхалтай нь тэдний ихэнх нь “Ж.Мягмар­доржоос айж байна” гэх шалтгаанаар ярилцлага өгө­хөөс татгалзсан юм.

Г.Ариунзаяа: Найз маань амиа хорлох хүн биш ээ

Юутай ч бид талийгаач Ж.Мөнхчимэгийн ойрын найз нарынх нь нэг гэгдэх бүсгүйг олж уулзсан. Тэрбээр анхандаа сонинд ярилцлага өгөхөөс татгалзсан төдийгүй өөрийнхөө зураг болон нэрийг тавиулахыг хүсээгүй юм. Улмаар “Зургийг чинь тавихгүйгээс гадна нэрийг нь өөрчилнө” гэж ятгасны эцэст хэргийн талаар дараах зүйлийг тодрууллаа.

-Талийгаач Ж.Мөнх­чи­мэг та хоёр хэр ойр дотно бай­­сан бэ?
-Бид олон жил нөхөр­лөсөн. Бүх зүйлээ л надад ярьж, хэлдэг найз минь бай­сан.

-Тэгвэл талийгаачийн найз залуу Ж.Мягмардор­жийг танина гэсэн үг үү?
-Танина.

-Тэд хэзээнээс ойртож дотноссон юм бол?
-Яг хэзээнээс гэдгийг нь сайн мэдэхгүй. Миний бо­дож байгаагаар 2010 онд л танилцсан юм шиг байна лээ. Найз маань надтай 2012 оны гуравдугаар сард Ж.Мягмардоржийг танил­цуулсан. Тухайн үед би найздаа “Чамаас бараг 20 насаар ах юм байна, бо­лиоч” гэж хэлдэг байсан.

-Харин талийгаач ха­риуд нь юу гэдэг байв?
-“Би Мийгаатай амьдрах­гүй, яваандаа л болино. Одоо­хондоо салж чадахгүй байна. Найз нь хайртай болчихсон юм шиг байна” гэж ярьдаг байсан.

-Ж.Мягмардоржийг өмнө нь эхнэр, хүүхэдтэй байсан гэдгийг нь мэдэх үү?
-Мэднэ.

-Өмнөх эхнэрээ зоддог байсан гэсэн. Талийгаачийг зодож дарамталдаг байв уу?
-Үгүй ээ. “Найзыг нь зо­дож зовоож байна” гэж надад нэг ч үг хэлж байгаагүй. Тэр хоёр үе үе л муудалцаж хэрэлд­дэг байсан.

-Ингэхэд Ж.Мягмардорж ямар зан ааштай хүн бэ?
-Ер нь л түргэн ууртай. Өм­нө нь юм, юм л хийдэг байсан гэсэн. Бидэнд болохоор хотод цагдаа байсан гэж хэлдэг. Одоо бол зах дээр хувиараа бизнес эрхэлдэг.

-Талийгаач амиа алдах өдрөө чамтай ярьсан уу?
-Тийм ээ.

-Яг юу ярьсан юм бол. Амиа хорлох тухайгаа хэл­сэн үү?
-Нас бардаг өдрөө 11:00 цаг өнгөрч байхад “Нөгөөх чинь хотоос гарчихсан гэнэ. Найзыг нь ална гээд байна. Найз нь эртхэн ажил руугаа явлаа” гэж мессеж бичсэн. Бас “Найз нь эм уугаад хүүх­дээ авахуулчихсан. Ж.Мяг­­мардоржид зулба­чих­лаа гээд хэлчихсэн. Хоёулаа үгээ тааруулья” гэж ярьсан.
Ямар ч байсан найз маань амиа хорлох хүн биш ээ. Найзыгаа байхгүй болчихсон гэдэгт одоо хэр нь итгэдэггүй. Найз маань надтай ярихдаа ахындаа байсан.
Тэр өдөр бэр эгч нь хүртэл байхгүй байж таарсан. Бүх зүйлийг цаанаас нь зохион байгуулчихсан ч юм шиг, үнэхээр сонин. /Уйлав/

-Ингэхэд талийгаачийн амиа алдсан байранд Ж.Мяг­­мар­дорж ганцаараа амьдар­даг байсан хэрэг үү?
-Тийм ээ, талийгаач тэд­нийд хонож өнжөөд л явдаг байсан. Ж.Мягмардорж най­зыг маань ажилд оруулж өгсөн. Урагшаа Эрээн рүү хоёр, гурван ч удаа хамт яв­сан. Бие биедээ хайртай хү­мүүс хамт зургаа авахуулж болно оо доо. Гэтэл талийгаач найз маань дандаа ганцаараа зургаа авахуулсан байдаг.
Дээр нь Ж.Мягмардорж хотод олон цаг байх хүн биш. Шууд л наашаа явах хүн. Миний бодлоор 11:00 цагийн үед хэдийн хотоос гарчихсан байсан байх.

-Таныг тухайн үед хэр­гийн газарт очсон гэж сонс­сон. Цагдаад анх дуудлага өгсөн хүн нь Ж.Мягмардорж гэсэн үү?
-Тийм гэсэн. Над руу эгч нь залгаад “Дүү маань утсаа авахгүй байна. Ажил­­­даа ч очоогүй гэнэ. Чи нө­гөөд­хийнх нь гэрт очоод үзээд өгөөч” гэсэн. Намайг 18:00 цагийн үед очиход цагдаа нар хэдийн ирчихсэн байсан.

-Тэгээд таныг дотогш оруул­сан уу, талийгаачийн цогцсыг харахад ямар нэгэн зодуулж, цохиулсан шарх сорви анзаарагдаагүй юу?
-Сайн харж чадаагүй ээ. Цагаан даавуугаар бүтээчих­сэн байсан. Би зөвхөн нүүрэн хэсгийг нь л сөхөж харсан. Хөхөрч хавдаад аймаар л болчихсон байсан. Харин найз маань гэртээ өмсдөг цамцтайгаа байсан.

-Тухайн үед Ж.Мягмар­дорж юу ярьж байх юм бэ?
-Мэдэхгүй ээ, ерөөсөө уул­заа­гүй. Бараан царайтай амьтан л байсан. Тэр өдрөөс хойш нэг ч таараагүй. Уг нь зах дээр наймаа хийдэг байсан. Саяхан явахад байх­гүй байна лээ. Дүү нь зогсдог байсан юм. Огт таних­гүй хүмүүс зогсож байна лээ.

Бидний яриа ийн өндөр­лөв. Тэрбээр “Нөхөр бид хоёр нэг хэсэг “Яана аа, биднийг орж ирээд алчих вий” гэж бодоод унтаж чаддаггүй бай­сан. Ямар сайндаа л гэр­тээ биш найзындаа очиж хонодог байлаа. Одооноос л гайгүй болж байна” гэв.

Н.Адьяа: Ж.Мягмардорж цочир ууртай, хэнийг ч гүжирдэж мэдэх хүн

Хууль хяналтынханаас эхлээд ойр дотныхон, таньж мэддэг хүмүүс нь хүртэл Ж.Мягмардоржийн талаар ямар нэгэн мэдээлэл өгөхөөс татгалзаж байгаа нь өөрийн эрхгүй анхаарал татаж байв. Бид Ж.Мягмардоржоос таван жилийн өмнө салсан эхнэрийнх нь ээж Н.Адьяатай холбогдсон юм. Тэрбээр мөн л түүнээс айж байгаагаа хэлээд уулзахаас татгалзав. Харин утасны цаанаас хэдэн асуултад хариулахыг зөвшөөрсөн тул дараах зүйлийг тодруулсан юм.

Түүний ярьж буйгаар Ж.Мягмардорж охинтой нь 10 гаруй жил ханилжээ. Ингэхдээ хоёр ч хүүхэдтэй болсон бөгөөд салахдаа танил талаа ашиглан шүүхийн шийдвэрийг өөрийнхөө талд гаргуулан хүүхдийн тэтгэмж тогтоолгоогүй аж.

-Ж.Мягмардорж охинтой чинь хэдэн жил ханилсан бэ?
-Өө, их олон жил ханил­сан. Том охин нь одоо 15 хүрч байна.

Үргэлжлэлийг энд дарж уншина уу