ЗГ: Байгалийн хий нийлүүлэх хоолой барих төслийн явцын талаар хэлэлцэж байна

Долоо хоног бүрийн Лхагва гаригт Засгийн газрын ээлжит хуралдаан болдог. Засгийн газрын өнөөдрийн/2025.04.02/ хуралдаанаар Монгол Улсын нутаг дэвсгэрээр дамжуулан Оросын Холбооны Улсаас Бүгд Найрамдах Хятад Ард Улс руу байгалийн хий нийлүүлэх хоолой барих төслийн явцын талаар, Уул уурхайн бүтээгдэхүүний экспорт, валютын нөөцийн нөхцөл байдлын талаар, Төмөр замын баруун, зүүн коридор байгуулах талаар, “НҮБ-ын Хөгжлийн бэрхшээлтэй хүмүүсийн эрхийн хорооноос Монгол Улсад ирүүлсэн зөвлөмжийг 2025-2031 онд хэрэгжүүлэх үйл ажиллагааны төлөвлөгөө батлах тухай” Засгийн газрын тогтоолын төсөл, Иргэдээс төрийн захиргааны төв болон нутгийн захиргааны байгууллага, албан тушаалтанд хандан 2024 онд гаргасан өргөдөл, гомдлын шийдвэрлэлтийн талаар зэрэг 25 асуудал хэлэлцэж, танилцаж байна. Мөн Засгийн газрын ээлжит хуралдаанд ЗГХЭГ-ын дарга Н.Учрал 39 ордыг стратегийн жагсаалтад оруулах асуудал хэлэлцүүлнэ.

Төгрөг нуур тэргүүтэй 39 том ордоор жагсаалт өргөтгөж, Үндэсний баялгийн сан дахь хуримтлалын дансаар нь иргэн бүрд баялгийн өгөөжийг хүртээх нь Л.Оюун-Эрдэнийн Засгийн газрын гол бодлого юм.

Энэ нь байгалийн баялгийн дийлэнхийг ард түмэнд хүртээх Үндсэн хуулийн заалт бодитой амилуулах юм. Зөвхөн "Эрдэнэс Тавантолгой"-оос стратегийн 55 ордын 34-50 хувьд оногдох ногдол ашгаас иргэд хүртэх боломж нээгдэнэ гэж өчигдөр мэдэгдсэн. Тиймээс дээрх стратегийн орд газартай холбоотой асуудлын талаар Засгийн газарт танилцуулах нь тодорхой болж байна.