УОК шатахуун импортлогчдыг орон нутагт анхаарлаа хандуулахыг хүслээ

УОК-ын Шуурхай штабаас газрын тосны бүтээгдэхүүн импортлогч, худалдаа эрхлэгч аж ахуйн нэгжийн удирдлагуудтай уулзалт хийж, Ник, Петростар, Шунхлай, Сод Монгол, Магнай трейд, Газ Ойл, Нью энержи стар, Синчи ойл зэрэг аж, ахуйн нэгжийн удирдлагууд оролцож, шатахуун тээвэрлэлтийн нөхцөл байдал, тулгамдаж байгаа асуудлын талаар санал солилцлоо.

Улсын хэмжээнд өнгөрсөн арваннэгдүгээр сард нийт 175 мянган литр АИ-92, дизель түлш орж ирсэн бол энэ сар гарсаар 21-ний өдрийн байдлаар 136 мянган литр АИ-92, дизель түлш нийлүүлэгдээд байна.

Ихэнх нутгийн 80 гаруй хувьд цасан бүрхүүл тогтож, зарим газарт их хэмжээний цас орсны улмаас зам даваанд хүндрэл учирч, шатахуун тээвэрлэгч аж, ахуйн нэгжүүдийн тээвэрлэлтийн үйл ажиллагаа удаашрах, түгээлт хийх автомашинуудын хүрэлцээ муу байгааг энэ үеэр онцоллоо.

УОК-ын шуурхай штабаас өвөлжилтийг эрсдэл багатай даван туулах арга хэмжээний хүрээнд хоол хүнс, эм тариа, өвс тэжээл, мах тээвэрлэлт зэрэг чиглэлийн тээврийн хэрэгсэлд QR кодоор ялгах тэмдэг хийж, шатахуун түгээлт хийх боломжоор ханган, тасралтгүй, шуурхай байхад анхаарч, өдөр тутамд хяналт тавьж ажиллаж байна.