Ubcab онлайн такси үйлчилгээ нэмэлт төлбөрийн цэсээ хааж, бүх иргэдэд энгийн тарифаар үйлчлэхээр болжээ

Олон нийтийн сүлжээнд UB cab үнэ, тарифтай холбоотой иргэд ихээхэн шүүмжлэх болсон. Улмаар энэ асуудалтай холбоотойгоор UB cab онлайн такси үйлчилгээний үнэ тарифт өөрчлөлт оруулж, мэдэгдэл гаргажээ.

Тус мэдэгдэлд “Автомашины дугаарын тэгш, сондгойгоор хөдөлгөөнд оролцож эхэлсэнтэй холбогдуулан дуудлагын эрэлт огцом нэмэгдэж UBCab үйлчилгээг сонгох хэрэглэгчид дуудлага өгөхдөө #Plus буюу нэмэлт мөнгө санал болгох нь огцом ихсэж байна. Үүнээс шалтгаалан жолооч нар зөвхөн нэмэлт төлбөр санал болгосон дуудлага хүлээж авах сөрөг үр дагавар гарч байгаатай холбогдуулан, хүнд хэцүү энэ мөчид салбарын тэргүүлэгч байгууллагын хувьд хэрэглэгчдийнхээ эрх ашгийг хангаж үнийн хөөрөгдөлтийг хязгаарлах үүднээс #Plus цэсийг оргил цагуудад хааж байна. Цаашид #Plus буюу нэмэлт үнэ санал болгодог үйлчилгээг энгийн буюу тодорхой тооны нэмэлтгүй дуудлага орхилгүй авч байж нээдэг технологийн хөгжүүлэлтийн тохиргоог яаралтай горимоор хөгжүүлж дуустал нээхгүй бөгөөд #Plus дуудлага авахын тулд жолооч нар дахин автомашины чанар стандартын үзлэгт хамрагдаж шаардлага хангасан нь тэнцүүлж байж нээх гэх мэт шаталсан арга хэмжээг авч үйлчилгээний чанар стандартыг сайжруулж ажиллах болно” гэв.