ЦЕГ: Хүчирхийлэлд өртсөн 3, хэрэг үйлдсэн гэх 4 хүүхдийн шинжилгээний хариуг прокурорын байгууллагын зөвшөөрснөөр нийтэд мэдээлэх боломжтой

Ламхай нарын шүүх шинжилгээний дүгнэлт гарсан талаар ЦЕГ-аас өнөөдөр /2023.06.28/ мэдээлэл өглөө.

Энэ талаар ЦЕГ-ын Хэвлэл, мэдээллийн төвийн мэргэжилтэн Э.Энхзаяа “Тухайн асуудалд хохирсон байж болзошгүй гурав, холбогдсон байж болзошгүй дөрвөн хүүхэд буюу нийт долоон хүүхдийг Шүүх шинжилгээний ерөнхий газарт шинжээч эмчийн дүгнэлт гаргуулахаар хандсан.

Одоогийн байдлаар шинжээч эмчийн дүгнэлт гарсан. Эрүүгийн хэрэг хянан шийдвэрлэх тухай хуулийн 29.3-р зүйлийн тав дахь хэсэгт заасны дагуу прокурорын байгууллагын зөвшөөрснөөр нийтэд мэдээлэх боломжтой гэж үзсэний дараа мэдээлнэ. 

Хэрэгт хохирсон байж болзошгүй гурван хүүхдийн нэгийх нь ар гэрээс хүсэлт гаргасны дагуу цагдаагийн байгууллагын түр хамгаалах байранд байршуулсан. Тухайн хүүхдэд цагдаагийн байгууллагаас хууль эрхзүйн болон сэтгэлзүйн зөвлөгөө өгч хүүхэд хамгааллын бүхий л үйлчилгээг үзүүлж байгаа.

Хэрэгт холбогдсон байж болзошгүй дөрвөн хүүхдэд хувийн баталгаа гаргуулах, таслан сэргийлэх арга хэмжээг авсан.

Зөвхөн гурван хүүхдийг шалгах биш бусад хүүхдүүдийг ч шинжилгээнд хамруулж, мөрдөн шалгах ажиллагаа явуулна.

Цагдаагийн байгууллагаас мөрдөн шалгах ажиллагааны явцад хэрэг гарсан гэх газарт шалгалтын ажиллагааг хийсэн. Асуудлыг тал бүрээс нь шалгаж байгаа.

Мөн Гэр бүл хүүхэд залуучуудын газартай хамтран хүүхэд хамгааллын чиглэлээр хамтарсан баг гарч ажиллаж эхэлсэн.” гэв.