АНУ-ын Ерөнхийлөгч Жое Байден өчигдөр мэдэгдэл хийжээ. Тэр хэлэхдээ:

"Бид Европ дахь түншүүдтэйгээ сайтар зөвлөлдсөний эцэст ОХУ-аас цаашид газрын тос авахгүй байхаар шийдвэрлэлээ.

Бид В.Путины хийж буй дайныг цаашид санхүүжүүлэхгүй!

Манай Европ дахь зарим түншүүд одоогоор ийм шийдвэр гаргахад бэлэн бус байгааг бид ойлгож байна. Цаашид эдгээр улс орнуудыг эрчим хүчний эх үүсвэрийн хувьд ОХУ-аас хараат бус болгох чиглэлээр бид хамтран стратеги боловсруулах болно.

Бид хамтдаа нэгдмэл зорилготой, эв нэгдэлтэй байна" гэж мэдэгдлээ.

Байден түүнчлэн эрх баригчдын хүчин чармайлтыг үл харгалзан АНУ-д шатахууны үнэ нэмэгдэнэ гэдгийг хүлээн зөвшөөрсөн байна. ОХУ-ын эсрэг авсан хориг арга хэмжээний үр дагавраас болж үнээ хөөрөгдөхгүй байхыг хувийн хэвшлийнхэнд уриалаад "Газрын тос, байгалийн хийн болон санхүүгийн компаниудын хувьд Украины дайн үнэ өсөх шалтгаан болж байгааг бид ойлгож байна. Гэхдээ хэт өсөлт, инфляц хөөрөгдөх шалтгаан биш" гэж Ерөнхийлөгч анхаарууллаа.

Өмнө нь тус улсын 60,000 гаруй шатахуун түгээх станцын үнийг хянадаг ашгийн бус Америкийн автомашины холбоо нэгдсэн улсын хэмжээнд шатахууны үнэ түүхэн дээд хэмжээнд хүрч, нэг галлон (3,785 литр) нь 4,17 ам.доллар давсан тухай мэдээлж байсан юм..

СЭТГЭГДЭЛ БИЧИХ